الماتىدا مەديكامەنتتەر مەن جەكە قورعانىس قۇرالدارىن (جقق) ءوندىرۋ بويىنشا فارماسيەۆتيكالىق كلاستەر قۇرىلادى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.
بۇعان دەيىن حابارلانعانداي، حالىقتى دارىلىك پرەپاراتتارمەن ۋاقتىلى قامتاماسىز ەتۋ ماقساتىندا الماتى قالاسىنىڭ اكىمدىگى ءبىرقاتار قوسىمشا شارالاردى قابىلدادى. بۇل تۋرالى ونلاين-بريفينگ بارىسىندا الماتى قالاسى اكىمىنىڭ ورىنباسارى ساپاربەك تۇياقبايەۆ ايتتى.
قالادا ءدارىحانالار مەن اۋرۋحانالاردى دارىلەردىڭ قاجەتتى قورىمەن قامتاماسىز ەتۋ ءۇشىن كەشەندى جۇمىستار جۇرگىزىلۋدە. وسىعان بايلانىستى الماتىدا بيۋدجەتى 5 ملرد تگ بولاتىن قالالىق تۇراقتاندىرۋ قورى قۇرىلدى. قوردىڭ باستى قىزمەتى پرەپاراتتاردى جەتكىزۋ توقتاپ قالعان جاعدايدا شۇعىل تۇردە ارەكەت ەتۋگە ارنالعان قاجەتتى رەزەرۆ قۇرۋ بولىپ تابىلادى.
قوسىمشا، الاتاۋ «يننوۆاسيالىق تەحنولوگيالار پاركى» ارنايى ەكونوميكالىق ايماعىنىڭ اۋماعىندا فارماسيەۆتيكالىق ءوندىرىس رەتتەلۋدە.
«قالادا مەديكامەنتتەر مەن جەكە قورعانىس قۇرالدارىن وتاندىق وندىرۋشىلەردىڭ ءوندىرۋى باعىتىندا دا جۇيەلى جۇمىستار جۇرگىزىلۋدە. اتاپ ايتقاندا، جىل سوڭىنا دەيىن، فارماسيەۆتيكالىق كلاستەردى قۇرۋ جوسپارلانۋدا. وسىنىڭ ءبارى يمپورتقا تاۋەلدى بولماۋ ءۇشىن جاسالۋدا»، — دەدى ساپاربەك تۇياقبايەۆ.
پىكىر قالدىرۋ