الماتى قالاسىنىڭ اكىمى ب. ساعىنتايەۆتىڭ تاپسىرماسىمەن كۆي جۇقتىرعان ناۋقاستار ەمدەلەتىن ستاسيونارلاردى دارى-دارمەكپەن ۇزدىكسىز قامتاماسىز ەتەتىن رەزەرۆتىك قور قۇرىلدى. ونىڭ جۇمىسىنا 5 ملرد. تەڭگە كولەمىندە قاراجات قاراستىرىلعان.

13 شىلدەدەن باستاپ رەزەرۆتىك قوردان ينفەكسيالىق جانە پروۆيزورلىق اۋرۋحانالارعا 70 مىڭنان استام قاجەتتى دارى-دارمەك قاپتاماسى جەتكىزىلدى. ونىڭ ىشىندە دەكسامەتازون، سەفترياكسون، ازيتروميسين، ەنوكساپارين، وفلوفلوكساسين، مەروپەنەم، كلەكسان جانە پاراسەتامول بار.

«بۇگىندە اۋرۋحانادا كۆي جۇقتىرعان ناۋقاستاردى، سونىمەن قاتار قوسالقى اۋرۋلاردى ەمدەۋگە قاجەت دارى-دارمەكتەردىڭ ايلىق قورى بار. بۇگىنگى تاڭدا اۋرۋحانادا دارى-دارمەكتىڭ جەتىسپەۋشىلىگى جوق»، — دەدى قالالىق ي. جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ ساراپشى-دارىگەرى تامارا ۋتاعانوۆا.

قورداعى دارى-دارمەكتەر فتيزيوپۋلمونولوگيا ورتالىعىنا دا جەتكىزىلدى. ىندەت باستالعان ۋاقىتتان بەرى بۇل اۋرۋحانا كارانتيندىك جانە پروۆيزورلىق ءبولىم رەتىندە جۇمىس ىستەپ كەلەدى. الايدا ءقازىر مۇندا تەك كوروناۆيرۋس جۇقتىرعان ناۋقاستار ەمدەلەدى.

«ەم قابىلداپ جاتقان ناۋقاستاردىڭ زارداپ شەكپەۋى ءۇشىن ءبىز ۇنەمى، كۇندىز-تۇنى، وزىمىزگە قاجەت دارى-دارمەكتەردىڭ ءوتىنىمىن جاسايمىز. نەگىزگى دارى-دارمەكتەردەن باسقا ءبىز گۋمانيتارلىق كومەك ەسەبىنەن دارىلىك زاتتار مەن باسقا دا مەديسينالىق زاتتاردى الامىز. ولار قويمالاردا قالىپ قويمايدى. ويتكەنى ولارعا ءاردايىم قاجەتتىلىك بار. بىزگە كەلگەن ناۋقاستار دارى-دارمەكتەردى جانە جالپى مەديسينالىق كومەكتى تولىق كولەمدە الادى. سوندىقتان پاسيەنتتەر تەزىرەك ساۋىعىپ، ۇيلەرىنە ورالادى»، — دەدى الماتى قالاسىنداعى فتيزيوپۋلمونولوگيا ورتالىعىنىڭ ينفەكسيا ءبولىمىنىڭ مەڭگەرۋشىسى ابزال دۇيسەنبەك ۇلى.

وسى كۇندەرى №7 قالالىق كلينيكالىق اۋرۋحانانىڭ ءدارىحانا قويماسىنىڭ مەديسينالىق قىزمەتكەرلەرى دەمالىسسىز جۇمىس ىستەيدى. دارى-دارمەكتەرگە سۇرانىس كۇن سايىن ارتىپ كەلەدى. ال جاڭا جەتكىزىلىمدى ءتۇسىرۋ جەدەلدىكتى قاجەت ەتەدى.

«قالا اكىمدىگىنىڭ قولداۋىمەن قاجەتتى دارى-دارمەكپەن قامتاماسىز ەتۋ رەتتەلدى. كەشە عانا ءبىز دارى-دارمەكتىڭ ۇلكەن پارتياسىن قابىلدادىق»، — دەدى قالالىق №7 كلينيكالىق اۋرۋحاناسى باس دارىگەرى ورىنباسارىنىڭ م. ۋ. ا. كۇنسۇلۋ جۇمابايەۆا.

اۋرۋحانا كوپسالالى جانە ينفەكسيالىق-پروۆيزورلىق كومەك كورسەتەدى. مۇندا 300-دەن استام پاسيەنت ستاسيونارلىق ەمدەۋدە جاتىر. قاجەتتى دارى-دارمەكتەرگە سۇرانىس كۇن سايىن تۇسۋدە.

كەشە №7 قالالىق اۋرۋحاناعا انتيكواگۋليانتتار، گورمونالدى، ۆيرۋسقا قارسى دارىلەر يەن انتيبيوتيكتەر ءتۇستى. ءقازىر بۇل پرەپاراتتار قوراپتان شىعارىلىپ، بولىمدەرگە تاراتىلدى. مەديسينالىق پەرسونالدى دارى-دارمەك جانە قورعانىس قۇرالدارىمەن قامتاماسىز ەتۋ 2 ايعا قاراستىرىلعان.

جالپى، 1 شىلدەدەن باستاپ «سك-فارماسيا» جشس-مەن بىرگە ميلليوننان استام ءدارى قاپتاماسىن جەدەل تۇردە قالالىق اۋرۋحانالارعا جەتكىزۋ ۇيىمداستىرىلدى. ونىڭ ىشىندە 437 مىڭ انتيبيوتيك، 77 مىڭنان استام انتيكواگۋليانت، 160 مىڭ گورمونالدى جانە 77 مىڭ ىستىق تۇسىرەتىن دارىلەر بار. قازىرگى ۋاقىتتا ءبىرىڭعاي وپەراتورمەن اعىمداعى جىلدىڭ تامىز ايىنىڭ سوڭىنا دەيىن رەزەرۆتەردى قالىپتاستىرۋ بويىنشا قوسىمشا كەلىسىمدەرگە قول قويىلۋدا.