الماتىدا اۋرۋحانادان 10 كۇندىك بالا كورونوۆيرۋستان تولىق ايىعىپ شىقتى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

الماتى قالالىق بالالارعا ارنالعان كلينيكالىق ينفەكسيالىق اۋرۋحانانىڭ باس دارىگەرى ەرجان سەراليننىڭ ايتۋىنشا، وسى جىلدىڭ 20-شى شىلدەسىندە قاناعاتتانارلىق جاعدايدا جاڭا تۋعان ءسابي اۋرۋحانادان شىعارىلعان.
بۇل تۋرالى COVID-19 ەمدەۋ جانە ستاسيوناردى دارى-دارىمەكپەن قامتاماسىز ەتۋ ماسەلەلەرى تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين-سۇحبات بارىسىندا ايتىلدى.

«كەشە ءبىز 10 كۇندىك نارەستەنى شىعاردىق. بالا پەرزەنتحانادا دۇنيەگە كەلىپ، بىزگە بىردەن جەتكىزىلدى. اناسى ەكەۋىنىڭ پتر ءاناليزى تەرىس شىعىپ، ۇيىنە امان- ەسەن شىعاردىق»، — دەدى ەرجان سەرالين.

پاندەميا باستالعالى الماتى ق. بالالار كلينيكالىق جۇقپالى اۋرۋلار اۋرۋحاناسىندا 239 بالا COVID-19-دان ستاسيونارلىق ەمدەۋدەن وتكەن. ونىڭ ىشىندە 230 بالا قاناعاتتانارلىق جاعدايدا، وڭ ديناميكامەن شىعارىلعان. قازىرگى ۋاقىتتا 9 ناۋقاس دارىگەرلەردىڭ باقىلاۋىندا ەمدەلۋدە.

«ولاردىڭ اراسىندا ورتاشا جانە اۋىر دارەجەلى پنيەۆمونيامەن اۋىرعان بالالار بولدى. بارلىعى امان-ەسەن شىعارىلدى، ءولىم جاعدايلارى تىركەلگەن جوق»، — دەپ اتاپ ءوتتى باس دارىگەر.

ستاسيونارلاردا بالالارعا پاتوگەنەتيكالىق ەم جۇرگىزىلەدى. ۆيرۋسقا قارسى پرەپاراتتار تاعايىندالمايدى. ەگەر ەكىنشى ءبىر باسقا ينفەكسيا قوسىلعان جاعدايدا انتيبيوتيكتەر بالانىڭ جاسىن ەسكەرە وتىرىپ، ءتيىستى مولشەردە دوزاسى تاعايىندالادى. سونىمەن قاتار، ءوروفارينستى سۋ بەرۋ ءادىسى قولدانىپ، يممۋنيتەتىن كوتەرۋ ماقساتىندا قىزۋ تۇسىرەتىن پرەپاراتتار قولدانىلادى. جالپى ەمدەۋ شاراسى جەدەل رەسپيراتورلى ۆيرۋستىق ينفەكسيالارعا قارسى باعىتتالعان.