الماتى قالالىق بالالار جۇقپالى اۋرۋلار اۋرۋحاناسى 125 وتتەگى كونسەنتراتورىمەن قامتاماسىز ەتىلەتىن بولادى. بۇل تۋرالى الماتى قالالىق بالالار جۇقپالى اۋرۋلارى اۋرۋحاناسىنىڭ باس دارىگەرى ەرجان سەرالين الماتى قالاسىنىڭ وڭىرلىك كوممۋنيكاسيا قىزمەتىنىڭ الاڭىندا وتكەن ونلاين-سۇحبات بارىسىندا ايتتى.

الماتى قالاسى اكىمدىگى 240 ورىندىق قالالىق بالالار كلينيكالىق جۇقپالى اۋرۋلار اۋرۋحاناسىن 125 وتتەگى كونسەنتراتورىمەن قامتاماسىز ەتەتىن بولدى.

«قازىرگى ۋاقىتتا بىزدە 25 كونسەنترانت بار، ونىڭ 17ء-سى 8 ليتردەن. (ول ەكى ادامعا جەتكىلىكتى). اپپاراتتار جەتكىلىكتى، ناۋقاستار تولىق قامتاماسىز ەتىلگەن. قالا اكىمدىگىمەن بىرلەسكەن جۇمىستىڭ ارقاسىندا كەلەسى ايدا بىزگە 125 وتتەگى كونسەنتراتورى بەرىلەدى. سونداي-اق، ءبىزدىڭ اۋرۋحانانىڭ بارلىق توسەك ورىندارىن قامتيتىن ەكى وتتەگى قوندىرعىسىن ورناتۋ جوسپارلانۋدا»، — دەدى ە. سەرالين.

اۋرۋحانانىڭ جانساقتاۋ ءبولىمى 12 ورىنعا ەسەپتەلگەن. باس دارىگەر ونىڭ بارلىعى وكپەنى جاساندى تىنىس الدىرۋ اپپاراتتارىمەن جابدىقتالعاندىعىن اتاپ ءوتتى.

«12 توسەككە ارنالعان 12 جاساندى تىنىس الدىرۋ اپپاراتى بار. الداعى ۋاقىتتا تاعى 6 قۇرىلعى ساتىپ الۋ جوسپارلانۋدا. سونىمەن قاتار، رەسپيراتورلىق قولداۋدى قاجەت ەتەتىن ناۋقاستار ءۇشىن ءار پالاتادا وتتەگى پۋنكتتەرى بار، وعان قوسىمشا وتتەگى ءموبيلدى ماشينالارىن قولدانامىز»، — دەپ تولىقتىردى ە. سەرالين.