31 شىلدە مەن 2 تامىز ارالىعىندا الماتى قالاسىندا قوعامدىق كولىك جۇرمەيتىن بولدى. بۇل تۋرالى الماتى كولىك حولدينگى حابارلادى.
"باس سانيتارلىق دارىگەردىڭ قاۋلىسىنا سايكەس مەرەكە جانە دەمالىس كۇندەرى (31 شىلدە، 1-2 تامىز) الماتى قالاسىنداعى قوعامدىق كولىكتىڭ، سونداي-اق مەتروپوليتەننىڭ جۇمىسى توقتاتىلاتىنىن ەسكە سالامىز" دەلىنگەن كولىك حولدينگىنىڭ تەلەگرامداعى اقپاراتتىق حابارلاماسىندا.
كوروناۆيرۋس احۋالىنا بايلانىستى الماتىدا بۇعان دەيىن دە بىرنەشە رەت قوعامدىق كولىكتىڭ ءجۇرۋى شەكتەلگەن. بۇعان قوسا، جولاۋشىلارعا قوعامدىق كولىكتە ماسكا تاعۋ مىندەتتەلگەن.
الماتى كوروناۆيۋس جۇقتىرعاندار سانى جونىنەن وڭىرلەر اراسىندا ءبىرىنشى ورىندا تۇر. سوڭعى رەسمي اقپاراتقا سايكەس، قالادا 11 مىڭنان استام ادامنان Covid-19 ينفەكسياسى تابىلعان. وسى ۋاقىتقا دەيىن ولاردىڭ 7 مىڭى جازىلدى، 111 ادام ۆيرۋستان قايتىس بولدى.
پىكىر قالدىرۋ