ساتبايەۆ قالاسىندا بۇزاقىلىق جاساعانى ءۇشىن 15 ادام ۇستالدى. بۇل تۋرالى Polisia.kz حابارلادى.

پورتالدىڭ حابارلاۋىنشا، 24 شىلدەگە قاراعان ءتۇنى ساتبايەۆ قالاسىندا ءبىر توپ ازامات بەس جاسار قىزدى زورلادى دەگەن كۇدىكپەن ۇستالعان ادامدى ءوز بەتىنشە جازالاۋعا ۇمتىلعان. تاس-تاياقپەن قارۋلانعان جاستار پوليسيا عيماراتىنا كىرمەك بولعان. پوليسەيلەر بۇل بۇزاقىلىقتىڭ الدىن الدى.

الايدا بۇزاقىلىق جاساعان ادامدار جولىنداعىنىڭ ءبارىن قيراتقان. قاقپانى، اۋلاداعى وتىرعىشتاردى، قازا تاپقان پوليسيا قىزمەتكەرلەرىنە ارنالعان ەسكەرتكىشتى، پوليسيا عيماراتىنىڭ اۋماعىنداعى شامداردى، تەرەزەلەردىڭ اينەكتەرىن سىندىرعان. سىرتقى بەينەباقىلاۋ كامەرالارى مەن قىزمەت اۆتوكولىگى دە بۇلىنگەن.

كەلتىرىلگەن زالالداردى باعالانىپ جاتىر. قازاقستان قىلمىستىق كودەكسىنىڭ ءۇش بابى ("بۇزاقىلىق"، "بوتەننىڭ مۇلكىن قاساقانا جويۋ نەمەسە ءبۇلدىرۋ"، "قۇقىق قورعاۋ ورگانى قىزمەتكەرىنىڭ ومىرىنە قول سۇعۋشىلىق") بويىنشا سوتقا دەيىنگى تەرگەۋ باستالدى.

قازىرگى ۋاقىتتا بۇزاقىلىق ارەكەتتەردى ۇيىمداستىرۋشىلار مەن بەلسەندى قاتىسۋشىلار انىقتالىپ، ۇستالدى. ۋاقىتشا ۇستاۋ يزولياتورىنا 15 ادام قامالدى. بارلىق تەرگەۋ ارەكەتتەرى قولدانىستاعى زاڭناما اياسىندا جۇرگىزىلىپ جاتىر.

ىشكى ىستەر ورگاندارى ۇستالعاندارعا قاتىستى ازاپتاۋ جانە قۇقىققا قارسى ارەكەت جاساۋ تۋرالى الەۋمەتتىك جەلىلەردە تاراتىلىپ جاتقان حابارلامالاردىڭ جالعان ەكەنىن ايتتى. مۇنداي نەگىزسىز حابارلامالاردىڭ اۆتورلارىنا قاتىستى قىلمىستىق جاۋاپكەرشىلىك قاراستىرىلعانىن ەسكەرتتى. ساتبايەۆ قالاسىنداعى بۇل وقيعادا پوليسيا قىزمەتكەرلەرى اتىس قارۋىن قولدانباعان.

بۇزاقىلارعا قاتىستى تەرگەۋ ءالى جالعاسىپ جاتىر. كىنالىلەر قولدانىستاعى زاڭناماعا سايكەس جازاعا تارتىلادى.