اقتاۋلىق بەلسەندىلەر وبلىستىق پوليسيا دەپارتامەنتىنىڭ باستىعى گەنەرال-مايور جاناربەك باقتىبايەۆ پەن وبلىستىق دەنساۋلىق ساقتاۋ دارىگەرى ەرعالي سىدىمانوۆتىڭ وتستاۆكاعا كەتۋىن تالاپ ەتۋدە. وعان سەبەپ وبلىستىڭ بۇرىنعى پوليسيا باستىعىنىڭ اناسىن جەرلەۋ راسىمىنە كەلۋشىلەردىڭ كوپ بولۋى. بۇل تۋرالى astanatv.kz حابارلادى.

ۆيدەودا جەرلەۋ راسىمىنە كارانتيننىڭ كۇشەيتىلگەنىنە قاراماستان، جۇزدەگەن قالا تۇرعىنى جينالعان. ءتارتىپ ساقشىلارىنىڭ جولدى جاۋىپ تاستاۋى ادامداردىڭ نارازىلىعىن تۋدىرعان. 

تۇرعىندار "ولارعا رۇقسات، بىزگە جوق" دەپ اشۋلى.

پوليسيا باسقارماسىنىڭ قازىرگى باسشىسى ءبىر كۇن بۇرىن قالا تۇرعىندارىنان توي جاساماۋعا جانە كارانتين تالاپتارىن قاتاڭ ساقتاۋعا شاقىرعان بولاتىن.

مۇحتار ۇمبەتوۆ اتتى قالا تۇرعىنى پوليسيا باستىعى مەن باس سانيتار دارىگەر جۇمىستان بوساتىلۋى كەرەك دەپ ەسەپتەيدى.

– ماڭعىستاۋ وبلىسىنىڭ پوليسيا باستىعى مەن باس سانيتار دارىگەر جۇمىستان بوساتىلۋى كەرەك. بۇگىنگى ءىس-شاراعا قاتىسقان بارلىق لاۋازىمدى تۇلعالارعا قاتىستى قىزمەتتىك تەرگەۋ جۇرگىزىلۋگە ءتيىس. وسى ادامداردىڭ بارلىعىنا اكىمشىلىك ايىپپۇل سالىنسىن، قىزمەت پەن ۇيىمداستىرۋشىلارعا تارتىپتىك جازا قولدانىلسىن. مەن قارالى وتباسىعا كوڭىل ايتامىن، حاتتاما جاسالىپ، بارلىق قاراپايىم ازاماتتار سياقتى ولارعا دا ايىپپۇل سالسىن، – دەدى ول.

كەيىننەن وبلىستىڭ پوليسيا باسقارماسى مارقۇمنىڭ تۋىستارىنا قاتىستى ق ر اكىمشىلىك قۇقىق بۇزۋشىلىق تۋرالى كودەكسىنىڭ 425-بابى (حالىقتىڭ سانيتارلىق-ەپيدەميولوگيالىق سالاۋاتتىلىعى سالاسىنداعى زاڭنامانىڭ تالاپتارىن، سونداي-اق گيگيەنالىق نورمالاردى بۇزۋ) بويىنشا اكىمشىلىك حاتتاما تولتىرىلعانىن حابارلادى.

– اتالعان وقيعا بويىنشا ءىس وبلىستىڭ سانيتارلىق-ەپيدەميالوگيالىق باقىلاۋ ورگاندارىنا جىبەرىلدى. مارقۇمنىڭ تۋىستارىنىڭ سوزىنشە، جينالعانداردىڭ كوبى ولاردىڭ تۋىستارى. الەۋمەتتىك اراقاشىقتىق ساقتاپ، بارلىعى دا بەتپەردە كيگەن، – دەدى وبلىستىڭ پوليسيا دەپارتامەنتىنىڭ وكىلدەرى. 

بقو پوليسيا ءبولىمىنىڭ باستىعى ءوزىنىڭ الەۋمەتتىك جەلىدەگى پاراقشاسىندا قوعامدا رەزونانس تۋدىرعان جاعدايدى ءتۇسىندىرىپ، تۋىستارىنان جەرلەۋگە كەلمەۋىن سۇراعانىن ايتتى.

– انامىزدى سوڭعى ساپارعا شىعارىپ سالۋعا كەلگەندەردىڭ بارلىعىنا شىن جۇرەكتەن العىس ايتامىن. كوپتەگەن ازاماتتار جاناشىرلىقتارىن بىلدىرۋدە. جەرلەۋ راسىمىنە كوپ ادام كەلەدى دەپ كۇتپەدىم. نەگىزى ەسكە الۋ مەن جەرلەۋ ءراسىمى كىشىگىرىم وتباسىلىق دەڭگەيدە وتەدى دەپ جوسپارلانعان بولاتىن. ەلدەگى پاندەمياعا بايلانىستى ءبىز بارلىق تۋىستارعا جەرلەۋگە كەلمەۋلەرىن ەسكەرتتىك. ءبىز تۋعان-تۋىستارىمىزعا ەسكەرتكەنىمىزبەن ادامدارعا كەلۋگە تىيىم سالا المادىق. انامىزدى اقتىق ساپارعا شىعارىپ سالۋعا كەلگەن ادامداردى قۇرمەتتەيمىن، وسىنداي قولداۋ بىلدىرگەندەرىڭىزگە العىسىم شەكسىز. وكىنىشكە قاراي، ەندىگى راسىمدەرگە كەلمەۋلەرىڭىزدى سۇرايمىن. وزدەرىڭىزگە ءمالىم، كارانتين تالاپتارىن ساقتاۋىمىز قاجەت. ءبىزدى دۇرىس ءتۇسىنىپ، ايىپتاماۋىڭىزدى سۇرايمىن، – دەدى بقو پوليسيا دەپارتامەنتىنىڭ باسشىسى ماقسۋدحان ابلازيموۆ ءوزىنىڭ الەۋمەتتىك جەلىدەگى پاراقشاسىندا.

جاپپاي جەرلەۋ راسىمىنەن كەيىن قازاقستاننىڭ ىشكى ىستەر مينيسترلىگى قىزمەتتىك تەرگەۋدى باستادى.

3 تامىزدا اقتاۋ قالاسىنىڭ تۇرعىندارى ق ر ءىىم گەنەرالىنىڭ اناسىن جەرلەۋ ءۇشىن ورتالىق كوشەنىڭ قورشاۋعا الىنعانىن ايتىپ، نارازىلىقتارىن بىلدىرگەن.