"ۇلى دالا اكادەمياسى" قوعامدىق قورىنىڭ ديرەكتورى بەرىك قادىروۆ پرايمەريز ارقىلى قازاقستاندا تالىمگەرلەر مەكتەبىن قۇرۋ كەرەك دەيدى. مۇنداي پىكىرىن ول "Nur Otan" پارتياسى جاقتاستارىنىڭ ليگاسى وتكىزگەن ونلاين-كونفەرەنسيادا ايتتى.

ساياساتتانۋشىلار مەن قوعام بەلسەندىلەرىنىڭ كونفەرەنسياسىنا شىعىس قازاقستان وبلىسى وسكەمەن قالاسىنان قاتىسقان بەرىك قادىروۆ بۇل ساياسي ناۋقان تۇتاستاي ەلدى جاقسى جاققا باستاۋى ءۇشىن، ءاربىر ادامنىڭ بويىنا وزگەرىس اكەلۋ كەرەك دەيدى.

– پرايمەريز قازاقستاننىڭ ساياسي ءومىرىن وزگەرتىپ قويماي، وزگە دە سالالارعا جاڭا لەپ اكەلۋى ءتيىس. ەلىمىزگە كەمى ءبىر تالىمگەرلەر مەكتەبى كەرەك بولىپ تۇر. سوندىقتان، پرايمەريز "Nur Otan" پارتياسىنىڭ عانا ساياسي دۇنيەسى بولماي، ۇلكەن مەن كىشىنىڭ اراسىنداعى ساياسي تالىمگەرلىك مەكتەپ بولۋى كەرەك، – دەيدى ول.

باسقارۋعا بەلسەندى ءارى ءبىلىمدى جاستار كەلۋ ءۇشىن ەڭ الدىمەن سەنزۋرانى جويىپ، ولاردىڭ ەركىن وي ايتۋىنا مۇمكىندىك بەرۋ كەرەك دەيدى بەرىك كادىر ۇلى.

سونداي-اق ول بولاشاق دەپۋتاتتاردى ءادىل بولۋعا، وتىرىك بايانداما جاساپ، جالعان سويلەمەۋگە شاقىردى.

– جاستارعا وتىرىك بايانداما جاساۋدى، جالپى وتىرىك ايتۋدى ۇيرەتىپ كەتكەن كەزەڭدەر بولدى. ونداي كەزەڭ مەنىڭ دە باسىمنان وتكەننەن كەيىن ايتىپ وتىرمىن. جاستاردىڭ ەركىن ويلاپ، ويىن اشىق جەتكىزۋىنە دە كەدەرگى كەلتىرۋگە بولمايدى. كەيدە ءبىر جيىنداردا مىقتى جاستاردى كورىپ قالامىز دا، كەيىن جوعالتىپ الامىز. سۇراستىرساڭ، "ۇلكەندەر تىيىپ تاستادى" دەپ جاتادى. مۇندايعا جول بەرمەۋىمىز كەرەك، – دەيدى ول.