ساكەن سارسەنوۆ ىشكى ىستەر ءمينيسترىنىڭ ورىنباسارى قىزمەتىنە تاعايىندالعاننان كەيىن ءوزىنىڭ Facebook جەلىسىندەگى پاراقشاسىندا جازبا قالدىردى.
جازبادا ۆيسە-مينيستر سارسەنوۆ پرەزيدەنت توقايەۆ پەن ىشكى ىستەر ءمينيسترى تۇرعىمبايەۆقا العىسىن ءبىلدىردى.
"ىشكى ىستەر مينيسترلىگىندە جۇمىسقا كىرىسىپ، ءوزىمنىڭ مىندەتتەرىم بويىنشا جۇمىس باعىتىن انىقتادىم. ىشكى ىستەر ورگاندارىنىڭ جۇمىسىن سيفرلاندىرۋدان باسقا، مەن ۆەدومستۆونىڭ ىشكى جانە سىرتقى بايلانىستارىن قاداعالايتىن بولامىن.
مينيستر ماعان ەلىمىزدىڭ ازاماتتارىمەن ىشكى ىستەر مينيسترلىگىنىڭ قىزمەتى بويىنشا اشىق ديالوگ ورناتۋدى تاپسىردى.
مينيسترلىكتى سيفرلاندىرۋ بويىنشا دا اۋقىمدى جۇمىس كۇتىپ تۇر، ونىڭ ورىندالۋ بارىسى تۋرالى وسىندا جازىپ وتىرامىن. ادەتتەگىدەي، سىزدەردىڭ يدەيالارىڭىز بەن ۇسىنىستارىڭىزعا اشىقپىن جانە ءارقاشان بايلانىستا بولامىن.
P.S. ماعان اسكەري شەن بەرىلەمە دەگەن كوپتەگەن سۇراقتار جازىلىپ جاتىر، ايتارىم – مەن ازاماتتىق لاۋازىمدا جۇمىس اتقارامىن، پوگون تاقپايمىن"،- دەلىنگەن جازبادا.
3 تامىز كۇنى پرەزيدەنت قاسىم-جومارت توقايەۆتىڭ وكىمىمەن ساكەن سەيتجاپپار ۇلى سارسەنوۆ ىشكى ىستەر ءمينيسترىنىڭ ورىنباسارى قىزمەتىنە تاعايىندالعان.
