سەمەي وڭىرىندەگى اباي اۋدانىندا قوڭىر اۋليە ۇڭگىرى بار. بۇل جەرگىلىكتى تۇرعىندار ءۇشىن كيەلى ورىن. مۇندا تۋريستەر كوپتەپ اعىلادى. بۇل جەردە كەزىندە اباي بولعان. مۇحتار اۋەزوۆ تە تالاي مارتە وسى كيەلى ورىنعا كەلگەن.
قوڭىر اۋليە ۇڭگىرى تۋرالى ميفتەر مەن اڭىزدار جەتەرلىك. بۇل جەردى ەڭ العاش رەت قوڭىر پايعامبار تاپقان ەكەن. اڭىز بويىنشا نۇحتىڭ كەمەسىنە ءۇش پايعامبار جەتە الماي، تاسقىن كەزىندە بورەنەنى پانالاپتى. سۋ تاسقىنىنىڭ بەتى قايتقان كەزدە قوڭىردىڭ بورەنەسى اقتاس جوتاسىنا كەلىپ تىرەلگەن ەكەن. وندا وسى ۇڭگىر بولعان. ۇڭگىردىڭ ىشىندە ەمدىك قاسيەتكە يە سۋ بولعان. سۋدىڭ مولدىرلىگى كريستالداي جارقىراپ تۇرعان. ءبىراق سۋ سۋىق بولعان (سۋدىڭ تەمپەراتۋراسى نەبارى 4 گرادۋس عانا جىلى).
جەرگىلىكتى اقساقالداردىڭ ايتۋىنشا، سۋدىڭ قاسيەتىن بۇرىنعى اتا-بابالار بىلگەن. مۇندا جوڭعارلارمەن سوعىستا جاراقات العان ساربازدار كەلىپ، ەم قابىلداعان.
وسى كيەلى ورىنعا كەلۋشىلەر قاسيەتتى سۋعا ءتۇسىپ، ەم بولاتىنىنا سەنەدى.
پىكىر قالدىرۋ