تەكەلى قالاسىنىڭ ەرىكتىلەرى ەرلەپ تۇر. ولار الەۋمەتتىك جاعىنان تومەن وتباسىلار مەن جەتىم-جەسىر، اۋرۋ-سىرقاۋلارعا، توسىننان جاردەمگە ءزارۋ بولىپ قالعاندارعا كومەك قولىن سوزۋدا. جاقسىلىق جاساۋعا جارىسا ۇمتىلىپ، بارىمەن ءبولىسىپ، ورتاق ماقساتقا جۇمىلا اتسالىسۋدا.

اتاپ ايتساق، «كەرىمبەك بي» مەشىتى جاماعاتىنىڭ باستاماسىمەن قالالىق اۋرۋحاناسىنا وتتەگى كونسەنتراتورى، قورعانىس كيىمدەرى (10 دانا)، قورعانىس بەتپەردەلەرى (5 دانا)، رەسپيراتور KN 95 (50 دانا) سىيعا تارتىلدى.

قۇربان ايت مەيرامى قارساڭىندا يگى شارانى قولعا الىپ، ءوز قولدارىنان كەلگەن كومەگىن كورسەتىپ جاتقان مەشىت جاماعاتىنىڭ قايىرىمدىلىعى – بەرەكە-بىرلىكتىڭ ۇلگىسى.

تەكەلى قالاسىنداعى «مەيىرىم» توبىندا 40 ەرىكتى بار. جىل باسىنان ەرىكتىلەر ءۇش رەت «ارداگەرلەردى ارداقتايىق» اكسياسىن وتكىزدى.  «شاپاعات» قارتتار ءۇيىنىڭ اۋلاسىنا تازالىق اكسياسىن جاسادى جانە تىششەنكو ميحايل ابراموۆيچ سوعىس ارداگەرىمىزدىڭ اۋلاسىن قىس مەزگىلىندە قاردان تازالاپ، اكتەپ بوياۋ جۇمىستارىن جاسادى. ەرىكتىلەر ەلىمىزدەگى توتەنشە جاعايعا بايلانىستى قيىن كەزدەرى 204 وتباسىنا ازىق-تۇلىك، قالامىزدىڭ تۇرعىندارىنا 1520 بەتپەردە تاراتتى. ەرىكتىلەر اپتا سايىن قالادا تازالىق اكسياسىن وتكىزۋدە.