نۇر-سۇلتاندا ەر ادام بولىپ ادامداردى الداعان ايەل ۇستالدى. بۇل تۋرالى قالالىق پوليسيا دەپارتامەنتىنىڭ باسپا ءسوز قىزمەتى حابارلادى.

حابارلامادا كورسەتىلگەندەي، ايەل ەر ادام رەتىندە تانىسىپ، ارتىنشا تۇرعىنداردان حابارلاسۋ ءۇشىن تەلەفونىن سۇراعان. كەيىن وقيعا ورنىنان قاشىپ كەتىپ وتىرعان. 

"پوليسيا قىزمەتكەرلەرى جەدەل ىزدەستىرۋ شاراسى بارىسىندا 30 جاستاعى ەلوردا تۇرعىنىن ۇستادى. ول بىرنەشە رەت الاياقتىق جاساعان. ەر ادام بولىپ تانىسىپ، تۇرعىنداردان حابارلاسۋ ءۇشىن تەلەفونىن سۇراعان. سودان سوڭ وقيعا ورنىنان ءىزىن سۋىتىپ وتىرعان. كۇدىكتىنىڭ سىرتقى كەلبەتى ەر ادامعا ۇقساس بولعان. ۇرلانعان ۇيالى تەلەفونداردى ارزان باعاعا كەزدەيسوق ادامدارعا ساتقان" دەلىنگەن حابارلامادا.

25 شىلدەدە كۇدىكتى قالادا ساۋدا ۇيلەرىنىڭ بىرىندە زەينەتكەردەن تەلەفونىن سويلەسۋگە سۇراپ، كەيىن وقيعا ورنىنان قاشىپ كەتكەن. زەينەتكەرگە 30 مىڭ تەڭگە كولەمىندە شىعىن كەلتىرگەن. 

دەپارتامەنتتىڭ حابارلاۋىنشا، كۇدىكتىنىڭ ۇستىنەن قازاقستاننىڭ قىلمىستىق كودەكسىنىڭ 190-بابى ("الاياقتىق") بويىنشا 4 ءىس قوزعالدى. سوتقا دەيىنگى تەرگەۋ امالدارى ءجۇرىپ جاتىر. كۇدىكتى ۋاقىتشا تەرگەۋ يزولياتورىنا قامالدى. ونىڭ وسى ءىس سەكىلدى قىلمىسى بار-جوعى تەكسەرىلىپ جاتىر.

نۇر-سۇلتان قالاسى پوليسيا دەپارتامەنتى كۇدىكتىدەن زارداپ شەككەن ادامداردى تومەندەگى مەكەنجايعا كەلۋىن نەمەسە تەلەفوندارعا حابارلاسۋىن سۇرايدى:

بەيبىتشىلىك كوشەسى، №19

8 (7172) 71-61-51؛ 71-60-69، 8-702-500-97-29 نەمەسە "102".