الماتىدا "المالى" تۇرعىن ءۇي كەشەنىندەگى ازاماتتارعا وق اتقان ادام ۇستالدى. بۇل تۋرالى zhest_kazakhstan پاراقشاسىندا حابارلاندى.
وقيعا 8 تامىز كۇنى الاتاۋ اۋدانى "المالى" تۇرعىن ءۇي كەشەنىنىڭ اۋلاسىندا بولعان. الەۋمەتتىك جەلىدە توبەلەستىڭ ۆيدەوسى جاريالانعان.
"ءتۇن ىشىندە مۋزىكا داۋسىمەن ادامداردىڭ مازاسىن العان ەر ادامنان ەكى تۇرعىن تىنىشتىقتى ساقتاۋدى سۇرايدى. ەر ادام وقىستان تاپانشامەن وق اتىپ، ءبىر تۇرعىننىڭ باسىنان تاپانشا سابىمەن ۇرعان. وقيعانىڭ سوڭى توبەلەسكە ۇلاسقان. تۇرعىندار ونى پوليسيا كەلگەنشە ۇستاپ تۇرعان. باس جاراقاتىن العان تۇرعىن اۋرۋحاناعا جەتكىزىلىپ، دارىگەرلەر باسىن تىككەن" دەلىنگەن پاراقشاداعى جازبادا.
پوليسيا دەپارتامەنتىنىڭ حابارلاۋىنشا، قازاقستاننىڭ قىلمىستىق كودەكسىنىڭ 293-بابىنىڭ 2-بولىگى ("بۇزاقىلىق") بويىنشا سوتقا دەيىنگى تەرگەۋ جۇرگىزىلۋدە.
قىلمىستىق ءىس بويىنشا 1986 جىلى تۋعان ەر ادام ۇستالىپ، ودان پنيەۆماتيكالىق تاپانشا تاركىلەنگەن.
پىكىر قالدىرۋ