قازاقستاندا 10 تامىزدا العاش رەت اباي كۇنى اتاپ وتىلۋدە. قازاقتىڭ ۇلى ويشىلى، اقىنى جانە اعارتۋشىسىنىڭ 175 جىلدىعىنا وراي ءال-فارابي اتىنداعى قازاق ۇلتتىق ۋنيۆەرسيتەتىندە تاقىرىپتىق زالدىڭ تۇساۋكەسەرى ءوتتى.

قازاقستاننىڭ پرەزيدەنتى قاسىم-جومارت توقايەۆ ءوزىنىڭ «اباي – رۋحاني رەفورماتور» اتتى ماقالاسىندا: «ءبىز ابايدى ءحىح عاسىردا ءومىر ءسۇرىپ، ءححى عاسىردىڭ ءسوزىن سويلەگەن دانىشپان رەتىندە الەمگە تانىتۋىمىز كەرەك. سونىمەن قاتار ونى ۇلتتىق سانانى جاڭعىرتۋعا زور ىقپال ەتكەن رۋحاني رەفورماتور رەتىندە دارىپتەۋگە مىندەتتىمىز. تۇپتەپ كەلگەندە، ءاربىر قازاق ابايمەن ماقتانۋعا ءتيىس!» – دەپ اتاپ ءوتتى.

ۇلى اقىننىڭ مەرەيتويىن مەرەكەلەۋ اياسىندا قازۇۋ-دىڭ عىلىمي كىتاپحاناسىندا جاڭا تاقىرىپتىق زال اشىلدى، وندا اباي قۇنانبايەۆقا ارنالعان ارنايى ەكسپوزيسيالار، سونداي-اق اقىننىڭ ءومىرى مەن شىعارماشىلىعىن اشىپ كورسەتەتىن سۋرەت گالەرەياسى ورنالاسقان. ورتالىق سۋرەتتە اقىن دالا مەن تاۋلار اياسىندا اق كيىمدە بەينەلەنگەن، بۇل ونىڭ جانى مەن ويىنىڭ تازالىعىن بەينەلەپ، ابايدىڭ ۇلىلىعىن جانە ونىڭ تۋعان جەرىمەن اجىراماس بايلانىسىن كورسەتەدى.

«زال 80 ورىنعا ارنالعان جانە زاماناۋي اۋديو-ۆيدەو جابدىقتارمەن جابدىقتالعان، مۇندا ستۋدەنتتەر ءۇشىن دارىستەر، كەزدەسۋلەر، كونفەرەنسيالار جانە باسقا دا عىلىمي شارالار وتكىزۋگە بولادى. سونىمەن قاتار، بۇل جەردە اباي شىعارمالارىنىڭ، ونىڭ ىشىندە سيرەك كەزدەسەتىن باسىلىمداردىڭ تۇراقتى كورمەسى بار. سونداي-اق، اباي جانە ونىڭ شىعارمالارى تۋرالى اۋديو-ۆيدەو ماتەريالداردىڭ تولىق جيناعى كەلتىرىلگەن»، - دەپ اتاپ ءوتتى تۇساۋكەسەر بارىسىندا كىتاپحانا ديرەكتورى كاليما تولەۋبايەۆا.

سونداي-اق، شارادا ۇلى اقىننىڭ حالىقارالىق اباي كلۋبى مەن قازۇۋ بىرلەسىپ باسىپ شىعارعان شىعارمالارىنىڭ تولىق جيناعى ۇسىنىلدى. وسى شىعارىلىم تۋرالى بەلگىلى قازاق جازۋشىسى، دراماتۋرگ جانە باسپاگەر روللان سەيسەنبايەۆ اڭگىمەلەدى. ول ون تومدىق باسىلىمعا ورىس، اعىلشىن، فرانسۋز جانە نەمىس تىلدەرىنە اۋدارىلعان تۋىندىلار كىرگەنىن اتاپ ءوتتى. جيناقتىڭ «اباي تۋرالى ءسوز» اتتى جەكە تومى تولىعىمەن اباي تۋرالى ادەبيەتتانۋشىلار، اقىندار، جازۋشىلار جانە الەمگە ايگىلى عالىمداردىڭ تۇجىرىمدارىنا ارنالعان.

«بيىل الەم ەكى ايتۋلى كۇندى – ۇلى ويشىل ءال-فارابيدىڭ 1150 جىلدىعىن جانە مايتالمان اقىن ابايدىڭ 175 جىلدىعىن اتاپ وتۋدە. قازاقتىڭ دارحان جەرى ادامزاتقا وزىنەن تىسقارى جەرلەردە رۋحاني جانە شىعارماشىلىق مۇراسىمەن تانىمال بولعان ۇلى پەرزەنتتەرىن سىيلادى. جاقىندا ءال-فارابي اتىنداعى قازۇۋ-دە ءال-فارابي ورتالىعى اشىلعان بولاتىن، ال بۇگىن – اباي اتىنداعى زال اشىلۋدا. وسىنىڭ ارقاسىندا ولار بىزگە، جاس ۇرپاققا جاقىنداي ءتۇستى، بۇل ءبىزدىڭ رۋحاني جاڭعىرۋىمىزعا دەگەن سەنىمىمىزدى كۇشەيتە تۇسپەك»، - دەدى روللان سەيسەنبايەۆ.

مەملەكەت باسشىسى اتاپ وتكەندەي، ءبىزدىڭ سانامىزدى، كوكجيەگىمىزدى كەڭەيتىپ، رۋحاني دامۋىمىز ءۇشىن ابايعا ارنالعان ءىس-شارالاردى وتكىزۋ اسا ماڭىزدى. ونىڭ مۇراسى قازاق حالقىنىڭ بولمىسى مەن ۇلتتىق ەرەكشەلىگىن، ءسالت-داستۇرى مەن رۋحىن ايقىن كورسەتەدى. ونىڭ كەمەلدىلىككە، وي جانە ادام جانىنىڭ تازالىعىنا ۇمتىلۋ تۋرالى يدەيالارى ءاربىر قازاقستاندىق ءۇشىن ماڭىزدى باعدارعا اينالۋى كەرەك.