الەۋمەتتىك جەلىدە تۇركىستان وبلىسى ارىس قالاسىندا جارىلىس بولعانى تۋرالى اقپارات تارادى. ارىس قالاسى اكىمىنىڭ باسپا ءسوز قىزمەتى بۇل جوسپارلى زالالسىزداندىرۋ جۇمىستارى ەكەنىن، جالعان اقپارات تاراتۋشىلار جاۋاپكەرشىلىككە تارتىلاتىنىن حابارلادى.
"قۇرمەتتى ارىس قالاسىنىڭ تۇرعىندارى مەن قالا قوناقتارى!
2020 جىلى تامىز ايىنىڭ 13 كۇنى ارىس اسكەري گونيزونى اۋماعىندا جوسپارلى زالالسىزداندىرۋ جۇمىستارى جۇرگىزىلدى. زالالسىزداندىرۋ جۇمىستارى قورعانىس مينيسترلىگىنىڭ ارنايى ماماندارىنىڭ باقىلاۋىندا. الاڭداماۋلارىڭىزدى سۇرايمىز. بۇل جۇمىستار ارىس قالاسىنىڭ حالقى ءۇشىن ءقاۋىپ توندىرمەيدى. قاۋىپكە نەگىز جوق. ۇرەيگە بوي الدىرماڭىزدار!!! جالعان اقپارات تاراتۋشىلار زاڭعا سايكەس جاۋاپكەرشىلىككە تارتىلاتىندىعىن نازارلارىڭىزعا جەتكىزەمىز" دەلىنگەن حابارلامادا.
اكىمدىكتىڭ instagram جەلىسىندەگى پاراقشاسىندا جاريالانعان اقپاراتتىڭ پىكىرلەر ءبولىمى جابىق تۇرعان سوڭ، حالىق الدىڭعى جازبالارعا جارىلىسقا قاتىستى "سىرتقا شىقساق ۆيرۋستارىڭ، ۇيدە وتىرساق جارىلىستارىڭ-اق بالە بولدى"، "تۋستەن كەيىن نەمەنەگە سالىپ جاتسىندار ەسكەرتۋدى؟!"، "ۋجااااااس جۇرەگىمىز جارىلىپ ولەتىن بولدىق قوي" دەگەن پىكىرلەرىن جازىپ جاتىر.
پىكىر قالدىرۋ