قازاقستان دەنساۋلىق ساقتاۋ ءمينيسترى الەكسەي سوي الماتى وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى بولىپ تاعايىندالعان ەرعالي سىدىمانوۆقا قاتىستى قىزمەتتىك تەرگەۋ جۇرگىزۋدى تاپسىردى. بۇل تۋرالى دەنساۋلىق ساقتاۋ مينينيسترلىگىنىڭ رەسمي وكىلى باعدات قوجاحمەتوۆ حابارلادى.
"بۇگىن قازاقستاننىڭ دەنساۋلىق ساقتاۋ ءمينيسترى الەكسەي سوي ب ا ق جانە الەۋمەتتىك جەلىلەردە تاراپ كەتكەن الماتى وبلىسىنىڭ باس سانيتار دارىگەرىنىڭ جەرگىلىكتى بازار كاسىپكەرلەرىمەن كەزدەسۋ بارىسىندا قالا تۇرعىندارىنا ايتقان سوزدەرى جازىلعان ۆيدەونى كورىپ شىقتى. ول تۇرعىنداردىڭ نارازىلىعىمەن كەلىسەدى جانە مۇنداي ارەكەت مەملەكەت قىزمەتكەرىنە ساي ەمەس دەپ ەسەپتەيدى" دەلىنگەن جازبادا.
ونىڭ ايتۋىنشا، قىزمەتتىك تەرگەۋگە قاتىستى تالقىلاۋ ناتيجەلەرى رەسمي سايتتاردا حابارلانادى.
الماتى وبلىسىنىڭ باس سانيتار دارىگەرى ەرعالي سىدىمانوۆ العاشقى جۇمىس كۇنىندە تالدىقورعان قالاسىنىڭ تۇرعىندارىمەن كەزدەسكەن بولاتىن. "مەن ساعان قىزمەت كورسەتپەيمىن. بولدى، ساۋ بولىڭدار، باسىمدى قاتىرماڭدار" دەگەن سوزدەرى تۇرعىنداردىڭ نارازىلىعىن تۋدىرىپ، ۆيدەو الەۋمەتتىك جەلى مەن باق-تا تاراعان.
پىكىر قالدىرۋ