شقو وڭىرلىك كوممۋنيكاسيالار قىزمەتىندە وتكەن بريفينگ بارىسىندا الەۋمەتتىك مەديسينالىق ساقتاندىرۋ قورىنىڭ شقو بويىنشا فيليالىنىڭ ديرەكتورى عالىمجان ءابىلوۆ ءتۇرلى مەديسينالىق ۇيىمداردىڭ مەديسينا قىزمەتكەرلەرىنە قوسىمشا اقى تولەۋ جۇيەسىن ءتۇسىندىردى.

-         دەنساۋلىق ساقتاۋ باسقارماسىنىڭ بۇيرىعىنا سايكەس مەديسينالىق ۇيىمدار كوروناۆيرۋسپەن كۇرەسۋگە اتسالىستى. باس دارىگەرلەر «قىزىل ايماقتا جۇمىس ىستەيتىن مەديسينا قىزمەتكەرلەرىنىڭ ءتىزىمىن بۇيرىقپەن بەكىتتى. ال جاۋاپتى سالا ماماندارى جۇمىس كەستەسىن قۇردى. اي بىتكەن سوڭ بۇيرىققا بايلانىستى تىزىمدەگى جۇمىسشىلاردىڭ تابەلى مەن جۇمىس كەستەسى شقو كوميسسياسىنا قارالۋعا بەرىلەدى. كوميسسيا مۇشەلەرى قوسىمشا اقى تولەۋ ماسەلەسىن قاراستىرادى، - دەدى عالىمجان ءابىلوۆ.

عالىمجان ءابىلوۆتىڭ ايتۋىنشا، وبلىس اكىمى ورىنباسارىنىڭ توراعالىعىمەن وتەتىن ايماقتىق كوميسسيا وتىرىسىنا دەنساۋلىق ساقتاۋ باسقارماسىنىڭ وكىلدەرى، تاۋارلار مەن كورسەتىلەتىن قىزمەتتەر ساپاسىن باقىلاۋ دەپارتامەنتىنىڭ جانە وكىمەتتىك ەمەس ۇيىمدار مەن كاسىپوداقتار كىرەدى. 

جۇمىس مەرزىمى اياقتالعان سوڭ بارلىق ءتىزىم كوميسسيا قولىنا تابىستالادى. كەيىن كوميسسيا مۇشەلەرى حاتتاما تولتىرىپ، قىزمەتكەرلەردىڭ جۇمىس ۋاقىتى مەن ءقاۋىپ توبىندا قانشا ساعات ىستەگەنىن سارالاپ،  قورعا ءتىزىمدى بەرەدى. وندا ەڭبەكاقىعا قوسىمشا اقى تولەۋ باستالادى.

-         بۇگىنگى كۇنى قوسىمشا اقى الۋعا ءوتىنىش بەرگەن 7606 قىزمەتكەردىڭ بارىنە جالپى سوماسى 1،8 ملرد.تەڭگە تولەندى. قوسىمشا اقىعا بايلانىستى تۋىنداعان سۇراقتار بويىنشا ەمحانا اكىمشىلىگىنە نەمەسە كاسىپوداق ۇيىمدارىنا، سونداي-اق قوسىمشا اقى تولەۋگە قاتىستى وڭىرلىك كوميسسيا مۇشەلەرىنىڭ كومەگىنە جۇگىنۋ كەرەك، - دەدى عالىمجان ءابىلوۆ.