«Nur Otan» ءتوراعاسىنىڭ ءبىرىنشى ورىنباسارى باۋىرجان بايبەك رەسپۋبليكالىق قوعامدىق قابىلداۋ بولمەسىندە ازاماتتاردى ونلاين-قابىلداۋ وتكىزدى، سونداي-اق ول بالالاردىڭ قۇقىعى مەن ايەلدەردى تۇرمىستىق زورلىق-زومبىلىقتان قورعاۋ ماسەل ەلەرى بويىنشا پارتيانىڭ «111 جەدەل قىزمەت» ارنايى بايلانىس ورتالىعىن ىسكە قوسۋعا دايىندىعىن تەكسەردى.

ونلاين-كەزدەسۋ بارىسىندا الماتى وبلىسىنىڭ تۇرعىنى مۇراتبەك اجىبەكوۆ وتكەن جىلدىڭ كوكتەمىندە بوگەتتىڭ توزۋىنان پەندجىم جانە ابات اۋىلدارىنداعى 276 ءۇيدى سۋ باسىپ، اۋىل تۇرعىندارىنا ايتارلىقتاي زيان كەلتىرىلگەنىن ايتتى. ۇسىنىلعان اقپارات بويىنشا، بوگەتتى جوندەۋگە 260 ملن.تەڭگە سوماسىنا سمەتالىق قۇجات ازىرلەنىپ، ءبىراق قارجىلاندىرۋ ماسەلەسى ءالى كۇنگە شەشىلمەگەن.

«مەملەكەت باسشىسى قاسىم-جومارت توقايەۆ ايتقانداي، اسا ماڭىزدى ەمەس شىعىستاردى قىسقارتۋ كەرەك، ءبىراق ازاماتتاردىڭ قاۋىپسىزدىك ماسەلەسى ءبىرىنشى ورىندا. تاياۋدا وتەتىن ءماسليحاتتىڭ وتىرىسىندا قارجىلاندىرۋ ماسەلەسى قارالۋعا ءتيىس. ماسەلەنى پارتيالىق باقىلاۋدا ۇستايمىز. ءسىز پارتيا قۇرىلعان كۇننەن باستاپ ونىڭ مۇشەسىسىز جانە تۋعان ولكەنى دامىتۋعا قاتىستى بارلىق ماسەلەنى قالت جىبەرمەي قاداعالاپ وتىراسىز. ءوزىڭىز سياقتى بەلسەندى ازاماتتار پارتيا الاڭىندا تۇيىتكىلدى جايتتاردى اشىق كوتەرسە، ءاربىر ماسەلە شەشىمىن تابادى دەپ ويلايمىن. ەلدىڭ بولاشاعىنا بەي-جاي قارامايتىن ءاربىر ازاماتقا ايتارىم، يگى ويلارىڭىزدى ىسكە اسىرۋعا ارقاسۇيەرىڭىز بولماسا، پرايمەريزگە قاتىسىڭىز. اشىق ىرىكتەۋ بولادى. تەك وسىلاي عانا ءبىز جەرگىلىكتى جەردەگى ادامداردىڭ ءومىرىن جاقسارتامىز»، - دەپ اتاپ ءوتتى باۋىرجان بايبەك.

قابىلداۋعا كەلگەن پاۆلودار وبلىسىنىڭ تۇرعىنى ۆەنەرا كاكانوۆا بيزنەسىن دامىتۋ ءۇشىن گرانت الۋ ماسەلەسىن العا تارتتى.

«ءتورت بالام بار. كۇيەۋىمەن اجىراسىپ كەتتىم. ءوزىم جالدامالى پاتەردە تۇرامىن. ۇيدە تاپسىرىس بويىنشا كونديتەرلىك ونىمدەر پىسىرۋمەن اينالىستىم. ءقازىر جابدىق جارامسىز بولىپ قالدى، جاڭاسىن ساتىپ الۋ كەرەك. مەن «ەڭبەك» مەملەكەتتىك باعدارلاماسى اياسىندا بيزنەسىمدى دامىتۋعا وتەۋسىز گرانت الۋعا قۇجاتتار تاپسىردىم. ماعان وسى گرانتتى الۋعا كومەكتەسۋلەرىڭىزدى سۇرايمىن»، - دەدى ۆەنەرا كاكانوۆا.

ءوز كەزەگىندە باۋىرجان بايبەك كوپبالالى انا بولۋ ۇلكەن جاۋاپكەرشىلىك ەكەنىن جانە مەملەكەت ءوز تاراپىنان جان-جاقتى قولداۋ كورسەتۋ ءۇشىن جاعداي جاساۋعا كومەكتەسۋى ءتيىس ەكەنىن اتاپ ءوتتى.

«كەشە عانا پارتيا ليدەرى نۇرسۇلتان نازاربايەۆ ءوزىنىڭ ۇندەۋىندە ءبىزدىڭ ورتاق مىندەتىمىز – جۇمىس ورىندارىن اشۋ، شاعىن جانە ورتا بيزنەستى جانداندىرۋ ەكەنىن ايتتى. تەك ءوز كۇشىنە سەنەتىن قايسار جان ەكەنىڭىزدى بايقاپ وتىرمىن. جاقىن ارادا كوميسسيا وتىرىسى وتەتىنى، قاراجات قاراستىرىلاتىنى تۋرالى اقپارات الدىم. سوندىقتان ءسىزدىڭ ماسەلەڭىز شەشىلەدى. مۇندا نازار اۋداراتىن تاعى ءبىر ماڭىزدى جاعداي بار. ءبىز ەكونوميكا سالاسىنداعى ايەلدەردىڭ بەلسەندىلىگىن جان-جاقتى دامىتۋعا جانە قولداۋعا ءتيىسپىز. بۇگىندە ايەلدەر قاۋىمى ەل حالقىنىڭ جارتىسىنان استامىن قۇرايدى. ءقازىر پارتيادا پرايمەريز باستالدى.

بۇل – جاڭا الەۋمەتتىك ليفت. ەلباسىنىڭ تاپسىرماسى بويىنشا پارتيالىق تىزىمدە ايەلدەر كەمىندە 30% - ى قۇراۋى ءتيىس. ولار ءارى قاراي دەپۋتات رەتىندە ايەلدەر كاسىپكەرلىگىن دامىتۋعا دا كومەكتەسەتىن بولادى»، - دەدى ول.

ازاماتتاردى قابىلداۋ بارىسىندا «Nur Otan» پارتياسى ءتوراعاسىنىڭ ءبىرىنشى ورىنباسارى اقتوبە وبلىسىنىڭ 24 جاستاعى تۇرعىنى ايبەك قوسماعامبەتوۆتىڭ دە ءوتىنىشىن تىڭداپ، الداعى ءماسليحات سەسسياسىندا قوبدا اۋدانىنىڭ تالدىساي اۋىلىنداعى جولداردى جوندەۋگە قاراجات ءبولۋ ماسەلەسىن قاراۋدى تاپسىردى.

«Nur Otan» ەلوردا تۇرعىنى مارينا باتايەۆاعا دا كومەكتەسەتىن بولدى. ول بالالارىنا وقۋعا قاجەتتى قۇرال-جابدىقتار الىپ، مەكتەپكە دايىنداۋعا كومەكتەسۋدى سۇراپ كەلدى.

«5 بالا ءوسىرىپ وتىرمىز، ولاردىڭ ۇشەۋى مەكتەپ جاسىندا. باسپانانى جالداپ تۇرامىز. كوروناۆيرۋس پاندەمياسىنا بايلانىستى تۇراقتى تابىسىمىزدان ايرىلدىق جانە بالالاردى وقۋ جىلىنا دايىنداۋدا قيىندىقتار تۋىنداپ تۇر»، - دەدى ول.

باۋىرجان بايبەك «Nur Otan» كوپبالالى وتباسىلارعا ءاردايىم قولداۋ كورسەتەتىنىن اتاپ ءوتتى.

«ءبىزدىڭ ساياسي پلاتفورمامىزعا سايكەس، وتباسى – قوعامىمىزدىڭ قۇندىلىقتارىن ساقتاۋدىڭ ماڭىزدى ينستيتۋتى. وتباسىندا ۇرپاقتار ساباقتاستىعى، ءوزارا قولداۋ، ەڭبەكسۇيگىشتىك جانە بىلىمگە ۇمتىلۋ داستۇرلەرى قالىپتاسادى. ءبارىمىز ءبىر ەلدىڭ ازاماتىمىز. ءبىزدى مەملەكەت قورعايدى، ءبىراق بىر-بىرىمىزگە دە كومەكتەسىپ، قامقور بولۋىمىز كەرەك. ءسىز پارتياعا سەنگەندىكتەن دە، كومەك سۇراپ كەلىپ وتىرسىز. «مەكتەپكە جول» اكسياسى اياسىندا تەك وقۋ قۇرالدارىن عانا ەمەس، قاشىقتان وقىتۋعا قاجەتتى بارلىق جابدىقتاردى الۋعا دا كومەكتەسەمىز»، - دەدى «Nur Otan» پارتياسى ءتوراعاسىنىڭ ءبىرىنشى ورىنباسارى.

وسى كۇنى باۋىرجان بايبەك پارتيانىڭ رەسپۋبليكالىق قوعامدىق قابىلداۋ بولمەسىندەگى «111 جەدەل قىزمەت» ارنايى بايلانىس ورتالىعىن ىسكە قوسۋعا دايىندىعىن تەكسەردى.
قىركۇيەك ايىنان باستاپ مۇندا بالالاردىڭ قۇقىن بۇزۋ جانە تۇرمىستىق زورلىق-زومبىلىق ماسەلەلەرى بويىنشا حابارلاسۋعا بولادى. بارلىق تەلەفون قوڭىراۋلارى قاتاڭ قۇپيا ساقتالادى.
پارتيانىڭ باسپا ءسوز قىزمەتىنىڭ مالىمەتىنشە، 7 ايدا قوعامدىق قابىلداۋ بولمەلەرىنە 270 مىڭ ادام جۇگىنگەن. وتىنىشتەردىڭ جارتىسىنان كوبى شەشىلدى. «Nur Otan»-عا كەلىپ تۇسكەن ونلاين-وتىنىشتەر 5 ەسەگە ارتتى.