مەملەكەت باسشىسى قاسىم-جومارت توقايەۆ تۇرمىستىق سىبايلاس جەمقورلىقپەن كۇرەسكە قاتىستى پىكىر ءبىلدىردى. بۇل تۋرالى اقوردا سايتى حابارلادى.
– كۇندەلىكتى ومىردە جەمقورلىق جاعدايلارىنا تاپ بولعان جۇرت شاراسىز كۇيگە تۇسەدى، ادىلدىكتىڭ بار ەكەنىنە سەنبەيدى. پاندەميامەن جالپى ۇلتتىق دەڭگەيدە جاپپاي كۇرەس ءجۇرىپ جاتقاندا پايدا تابۋ ءۇشىن ادام قانشالىقتى ارسىز بولۋى كەرەك؟ مىسالى، الماتىداعى جەتىسۋ اۋدانى اكىمدىگىنىڭ قىزمەتكەرلەرى ازاماتتاردى بلوك بەكەتتەن وتكىزۋ ءۇشىن ۇنەمى پارا الىپ وتىرعان. مۇنداي دەرەكتەر بىرنەشە وڭىردە بايقالدى. ءتىپتى، بارلىق جەردە وسىلاي بولعان شىعار دەپ ويلايمىن، – دەيدى ول.
پرەزيدەنت سىبايلاس جەمقورلىققا قارسى ءىس-قيمىل اگەنتتىگى ۇكىمەتپەن بىرلەسىپ، تۇرمىستىق جەمقورلىقپەن كۇرەس جونىندەگى جول كارتاسىن ازىرلەۋى كەرەگىن اتاپ ايتتى.
– ازاماتتارىمىز تۇرمىستىق سىبايلاس جەمقورلىقپەن بەتپە-بەت كەلىپ وتىرعان كەزدە ءسىز بەن ءبىزدىڭ ىستەپ جاتقان جۇمىسىمىزدىڭ ەش تيىمدىلىگى بولمايدى. ەشقانداي حالىقارالىق رەيتينگتىڭ دە كەرەگى بولماي قالاتىنى تۇسىنىكتى. ءتۇرلى تارتۋ-تارالعى بەرۋ، سىيلىق تالاپ ەتۋ، ديپلوم ساتىپ الۋ – كەلمەسكە كەتۋى كەرەك. بۇل ءۇشىن قوعامدا جەمقورلىقتان جاپپاي جيرەنۋگە قول جەتكىزۋىمىز قاجەت، – دەدى توقايەۆ.
پىكىر قالدىرۋ