ۇلىبريتانيا رەسەيدىڭ قاۋىپ-قاتەرىنەن قورعانۋ ءۇشىن ۋكرايناعا كورولدىك اسكەري-تەڭىز فلوتى كەمەلەرىن جىبەرمەك. ۇلىبريتانيا قورعانىس ءمينيسترى بەن ۋوللەس جاڭا تەڭىز جاتتىعۋلارى ارقىلى لوندون ۋكراينانىڭ اسكەري-تەڭىز كۇشتەرىنە كومەكتەسەتىنىن ايتتى. بۇل تۋرالى لوندوندا شىعاتىن The Telegraph گازەتى حابارلادى.
باسىلىمنىڭ جازۋىنشا، قارا تەڭىزدەگى رەسەيدىڭ قاۋىپ-قاتەرىنەن قورعانۋ ءۇشىن كورولدىك اسكەري-تەڭىز كۇشتەرى ءبىرىنشى رەت ۋكرايناعا اسكەري كەمەلەر جىبەرەدى.
بەن ۋوللەس جاڭا تەڭىز جاتتىعۋلارى ارقىلى ۇلىبريتانيا ۋكراينانىڭ اسكەري-تەڭىز كۇشتەرىنە كومەكتەسەتىنىن ايتقان. ۋوللەستىڭ سوزىنشە، وسىلاي ىستەۋ ارقىلى "رەسەيدىڭ سەپاراتيستەرىنەن اۋماقتىق تۇتاستىقتى" قورعايدى.
– ءبىز ءقازىردىڭ وزىندە مىڭداعان ۋكراينالىق پەرسونالعا العاشقى مەديسينالىق كومەك كورسەتۋدەن باستاپ جەدەل جوسپارلاۋعا دەيىنگى كوپتەگەن شەبەرلىكتەردى ۇيرەتتىك، ولاردىڭ بارلىعى رەسەيدىڭ سەپاراتيستەرىنەن اۋماقتىق تۇتاستىعىن قورعايدى، – دەدى ۋوللەس.
ۇلىبريتانيا قورعانىس ءمينيسترىنىڭ ايتۋىنشا، تەڭىزدەگى دايىندىق جونىندەگى باستاما ناتو-نىڭ اليانسىمەن جانە بۇكىل الەمدەگى قارۋلى كۇشتەرمەن تىعىز ىنتىماقتاستىق ورناتۋعا مۇمكىندىك بەرەدى جانە ۋكراينا بيلىگىنىڭ ناتو-نىڭ جاڭا مۇمكىندىكتەرىن پايدالانىپ، سەرىكتەس مارتەبەسىن قۇرۋعا كومەكتەسەدى.
كەشە ۋكراينادا بولعان ۇلىبريتانيا قورعانىس ءمينيسترى كورولدىك اسكەري-تەڭىز كۇشتەرىنىڭ كۇزدە ايماققا جىبەرىلەتىنىن راستادى. سونىمەن قاتار، ول ۋكراينا قورعانىس ءمينيسترى اندرەي تارانمەن كەزدەسۋدە ايماقتىق قاۋىپسىزدىك جانە ءوزارا مۇددەلىلىك پەن ىنتىماقتاستىق ماسەلەلەرىن تالقىلاعان.
بۇل باستاماعا ۇلىبريتانيا كورولدىك اسكەري-تەڭىز كۇشتەرى مەن شۆەسيا، كانادا جانە دانيا اسكەري-تەڭىز كۇشتەرى قاتىسپاق.
پىكىر قالدىرۋ