ۇلىبريتانيا كورولدىك اسكەري-تەڭىز فلوتى رەسەيدىڭ قاۋىپ-قاتەرىنەن قورعانۋ ءۇشىن ۋكرايناعا كەمەلەر جىبەرمەك. ۇلىبريتانيا قورعانىس ءمينيسترى بەن ۋوللەس جاڭا تەڭىز جاتتىعۋلارى ارقىلى لوندون ۋكراينانىڭ اسكەري-تەڭىز كۇشتەرىنە كومەكتەسەتىنىن ايتتى. بۇل تۋرالى لوندوندا شىعاتىن The Telegraph گازەتى حابارلادى.
كورولدىك اسكەري-تەڭىز كۇشتەرى قارا تەڭىزدەگى رەسەيدىڭ قاۋىپ-قاتەرىنەن ءوزىن قورعاۋ ءۇشىن ءبىرىنشى رەت ۋكرايناعا اسكەري كەمەلەر جىبەرەدى.
بەن ۋوللەس جاڭا تەڭىز جاتتىعۋلارى ارقىلى ۇلىبريتانيا ۋكراينانىڭ اسكەري-تەڭىز كۇشتەرىنە كومەكتەسەتىنىن ايتتى.ۋوللەستىڭ سوزىنشە، وسىلاي ىستەۋ ارقىلى "رەسەيدىڭ سەپاراتيستەرىنەن اۋماقتىق تۇتاستىقتى" قورعايدى.
–ءبىز ءقازىردىڭ وزىندە مىڭداعان ۋكرايندىق پەرسونالعا العاشقى مەديسينالىق كومەك كورسەتۋدەن باستاپ جەدەل جوسپارلاۋعا دەيىنگى كوپتەگەن شەبەرلىكتەردى ۇيرەتتىك، ولاردىڭ بارلىعى رەسەيدىڭ سەپاراتيستەرىنەن اۋماقتىق تۇتاستىعىن قورعايدى،– دەدى ۋوللەس.
ۇلىبريتانيا قورعانىس ءمينيسترىنىڭ ايتۋىنشا، تەڭىزدەگى دايىندىق جونىندەگى باستاما ناتو-نىڭ اليانسىمەن جانە بۇكىل الەمدەگى قارۋلى كۇشتەرمەن تىعىز ىنتىماقتاستىق ورناتۋعا مۇمكىندىك بەرەدى جانە ۋكراينا بيلىگىنىڭ ناتو-نىڭ جاڭا مۇمكىندىكتەرىنەن پايدالانىپ سەرىكتەس مارتەبەسىن قۇرۋعا كومەكتەسەدى.
كەشە ۋكراينادا بولعان ۇلىبريتانيا قورعانىس ءمينيسترى كورولدىك اسكەري-تەڭىز كۇشتەرىنىڭ كۇزدە ايماققا جىبەرىلەتىنىن راستادى. سونىمەن قاتار، ول ۋكراينا قورعانىس ءمينيسترى اندرەي تارانمەن كەزدەسۋدە ايماقتىق قاۋىپسىزدىك جانە ءوزارا مۇددەلىلىك پەن ىنتىماقتاستىق ماسەلەلەرىن تالقىلاعان.
بۇل باستاماعا ۇلىبريتانيا كورولدىك اسكەري-تەڭىز كۇشتەرى مەن شۆەسيا، كانادا جانە دانيا اسكەري-تەڭىز كۇشتەرى قاتىسپاق.
پىكىر قالدىرۋ