الماتى وبلىسى ەڭبەكشىقازاق اۋدانىنا قاراستى ورنەك اۋىلىندا تاپا تال تۇستە جاس كەلىنشەكتى ءولتىرىپ، ءمايىتىن ورتەپ جىبەرگەن كۇدىكتى انىقتالدى. بۇل تۋرالى جەرگىلىكتى پوليسيا حابارلادى.

قايعىلى وقيعا 20 تامىز كۇنى بولعان. كەلىنشەك بىرنەشە ساعات بويى ۇيگە ورالماعان سوڭ جاقىندارى قۇقىق قورعاۋشىلارعا حابار بەرىپ، وزدەرى دە ىزدەۋگە كىرىسىپ كەتكەن. ءبىراق تاۋلىك وتكەن سوڭ 21 جاستاعى كەلىنشەكتىڭ دەنەسى اۋىل شەتىنەن تابىلعان.

جاس كەلىنشەك اكە-شەشەسىنىڭ ۇيىنەن شىعىپ، كۇيەۋىنىڭ جەكە قوجالىعىنا كەتىپ بارا جاتقان جولدا قايتىس بولعان. كۇدىكتى كەلىنشەكتى تۇنشىقتىرىپ، سۋعا باتىرىپ كەتكەن. كەيىننەن وقيعا ورنىنا قايتىپ كەلىپ ءمايىتتى ورتەپ جىبەرگەنى بەلگىلى بولدى.

– كىسى ءولتىردى دەگەن كۇدىكپەن اتالعان اۋىلدىڭ 28 جاستاعى تۇرعىنى ۇستالدى. بۇرىن كىسى توناعانى ءۇشىن قىلمىستىق جاۋاپكەرشىلىككە تارتىلعان جانە ءقازىر ەش جەردە جۇمىس ىستەمەيتىنى انىقتالدى. كۇدىكتى ۋاقىتشا ۇستاۋ يزولياتورىنا قاماۋعا الىندى، – دەدى وبلىستىڭ پوليسيا دەپارتامەنتىنىڭ رەسمي وكىلى اقبوتا قۋانىشبەك قىزى.

– وسىعان دەيىن ارتىق قىلىعىن بايقامادىم. اۋىلداستارمەن جاقسى ارالاساتىن. نۇر-سۇلتانعا بارىپ جۇمىس ىستەپ كەلدى. مىناداي ىسكە باراتىنىن بىلمەدىم. جاعدايدا ەستىگەندە سەنبەي قالدىم، – دەپ ايتتى اۋىل تۇرعىنى يلحام جيلەلوۆ.

اتالعان دەرەك بويىنشا ق ر قىلمىستىق كودەكسىنىڭ 99-بابى 1-بولىگى بويىنشا (ادام ءولتىرۋ) ءىس قوزعالىپ، سوتقا دەيىنگى تەرگەۋ جۇمىستارى باستالدى.