قازاقستاندىق پروديۋسەر، تەاتر جانە كينو اكتەرى المات ساقاتوۆ "ۋاقىت كورسەتەدى" Youtube ارناسىنا سۇقبات بەردى.

جۋرناليست نۇرسەيىت جىلقىشىباي اكتەردان جاقىندا قايتىس بولعان نۇرلان احمەتوۆپەن قانداي جاقىندىعى بار ەكەنىن سۇرادى. المات ساقاتوۆ:

– اللا تاعالا ادامعا جولداستى كوپ بەرەدى. مەنىڭ 7-8 عانا ماڭدايعا بىتەر دوسىم بار. سونىڭ ءبىرى وسى نۇرەكەڭ بولعان. ونىڭ مىنەز-قۇلقى، ادامعا كوزقاراسى، اسىرەسە مىنا قازاق دەگەن كەزدە ءپاتريوتيزمى ەرەكشە ەدى. ول ماعان وتە جاقىن دوستىڭ ءبىرى بولاتىن. ومىردەن ءوتتى، مەن ونىڭ ءومىرىن باسقا ۇلتتىڭ بالاسى ءولتىردى دەپ تۋرا ايتا المايمىن. ويتكەنى ول دالەلدەنگەن نارسە ەمەس. ءبىراق وعان بەس رەت قاستاندىق جاسالدى. تۇسىنەمىن ماشىنەمەن قاعىپ كەتسە، بايقاۋسىزدا ءولىپ كەتسە. بۇل جەردە كۇدىكتەنەتىن نارسە كوپ. ونى اۆتوماتپەن اتتى، گراناتامەن جاردى. دەمەك، ونى ءولتىرۋ كەرەك بولعان.

المات ساقاتوۆ نۇرلان احمەتوۆتىڭ ولىمىنە كىنالى بولۋى مۇمكىن وقيعا تۋرالى دا ايتتى.

– 2007 جىلى نۇرلاندار قاتىسقان قازاق-شەشەن قاقتىعىسى بولعان ەدى. ول بەلگىلى نارسە. سودان كەيىن نۇرلاننىڭ ومىرىنە ءقاۋىپ ءتوندىرۋ باستالعان. ءبىر ەمەس ءتورت رەت بولدى. باسقا كىم دەپ ويلايمىز. مەن ءوزىم سول ۇلت(شەشەن - رەد.) دەپ ويلايمىن. رامزان كادىروۆ كەلسىن دەمەيمىن. ونىڭ وسى جاقتا دياسپوراسى بار، سولار كەلسىن. قازاقتى ورىس نەمەسە ۇيعىر ۇرسا وندا تەك ءبىر ادام جاۋاپ بەرەدى. كەرىسىنشە، قازاقتىڭ بالاسى ۇيعىر، شەشەن، ورىستى ۇرسا بۇكىل قازاق جامان، بۇكىل قازاق جاۋاپ بەرەدى. قازاقستان نەگىزى تۇرمەنىڭ وتانى. كارلاگ، الجير باسقاسىن ايتپاي-اق قويايىن. ءبىراق اشارشىلىق كەزىندە باسقا ۇلت كەلگەندە نانىمىزدى ءبولىپ بەردىك. باسقا ۇلت ايتىپ وتىرادى "ءبىز كەلگەندە كومەكتەسكەن" دەپ.  ءجۇز بىردەڭە ۇلت بار بولسا، سولار كۇنىنە ءجۇز رەت شاڭىراققا قاراۋ كەرەك. ولار قاي جەردەن ءناپاقا تاۋىپ وتىرعانىن ءبىلىپ، 0،5 پايىز بولسا دا راقمەتى بولۋ كەرەك. نۇرلان شەشەننىڭ بالاسىن ولتىرگەن جوق، ءبىراق قاقتىعىسقا قاتىستى، تۇرمەگە وتىرىپ شىقتى،- دەدى اكتەر. 

سۇقباتتىڭ تولىق نۇسقاسىن تومەندەگى ۆيدەودان كورە الاسىزدار.