تۇركىستان وبلىسىندا 21 جولاۋشى وتىرعان اۆتوبۋس اۋدارىلدى. بۇل تۋرالى Polisia.kz حابارلادى.
پورتالدىڭ حابارلاۋىنشا، جول-كولىك وقيعاسىنا قاتىستى تەرگەۋ جۇرگىزىلىپ جاتىر.
"26 تامىز كۇنى ساعات 06:30 شاماسىندا تۇلكىباس اۋداندىق پوليسيا بولىمشەسى كەزەكشى بولىمىنە اۋرۋحانادان الماتى-تاشكەنت-تەرمەز تاس جولىنىڭ 649 شاقىرىمىندا جولاۋشىلار اۆتوبۋسىنىڭ اۋدارىلعانى تۋرالى حابارلاما كەلىپ ءتۇستى. جول-كولىك وقيعاسى ورىن العان جەرگە ءبىرىنشى بولىپ تۇلكىباس اۋداندىق پوليسيا بولىمشەسى جەدەل-تەرگەۋ توبى، وبلىستىق پاترۋلدىك پوليسيا باتالونى جانە توتەنشە جاعداي قىزمەتكەرلەرى كەلدى. پوليسەيلەر مەن توتەنشە جاعداي قىزمەتكەرلەرى جولاۋشىلارعا اۋدارىلعان اۆتوبۋستان شىعۋعا كومەكتەستى" دەلىنگەن حابارلامادا.
اۆتوبۋس جۇرگىزۋشىسى مەن ءبىر جولاۋشى اۋرۋحاناعا جاتقىزىلدى. قالعان 19 جولاۋشى مەديسينا كومەگىن الۋ ءۇشىن سايرام، تۇلكىباس اۋداندارى مەن شىمكەنت قالاسىنىڭ اۋرۋحانالارىنا جەتكىزىلدى. جولاۋشىلاردىڭ اراسىندا ەكى جۇكتى ايەل دە بار.
الدىن الا مالىمەتتەر بويىنشا، اۋا رايىنىڭ قولايسىزدىعىنان جۇرگىزۋشى كولىك تىزگىنىن باسقارا الماي قالعان.
قازىرگى ۋاقىتتا قىلمىستىق كودەكسىنىڭ 345-بابى ("جول قوزعالىسى جانە كولىك قۇرالدارىن پايدالانۋ ەرەجەلەرىن بۇزۋ") بويىنشا سوتقا دەيىنگى تەرگەۋ امالدارى جۇرىگىزىلىپ جاتىر.
پىكىر قالدىرۋ