بۇل كورسەتكىش بويىنشا شىعىس قازاقستان رەسپۋبليكا كولەمىندە 2-ورىندى يەلەنىپ تۇر. قازاقستان بويىنشا بارلىعى 260 مىڭنان استام ءوتىنىش بەرىلگەن.
28 797 شىعىسقازاقستاندىق بيزنەس سۋبەكتىسى InfoKazakhstan سايتى ارقىلى جۇمىسىن قايتا جانداندىرۋعا ءوتىنىش ءبىلدىردى. شقو-دان كەلىپ تۇسكەن ءوتىنىشتىڭ 80% (23 575) استامى ماقۇلداندى. تىركەۋ ۋاقىتى بەلگىسىز ۋاقىتقا دەيىن ۇزارتىلدى.
"شىعىسقازاقستاندىق كاسىپكەرلەر پورتالدا بەلسەندى تۇردە تىركەلىپ، جۇمىستارىن جانداندىرۋدا. بىزگە پورتال بويىنشا سۇراقتار تۋىنداعان جاعدايدا كاسىپكەرلىك سۋبەكتىلەرى ۇنەمى حابارلاسادى. بۇگىنگى كۇنى عانا 387 قوڭىراۋ كەلىپ ءتۇستى. ەستەرىڭىزگە سالا كەتەيىن، پورتال تۋرالى بارلىق اقپاراتتى فەيسبۋك الەۋمەتتىك جەلىسىندەگى "بيزنەس ۆ ۋست-كامەنوگورسكە ي ۆوستوچنو-كازاحستانسكوي وبلاستي" توبىنان تابا الاسىزدار. سونىمەن قاتار 1432 نومىرىنە قوڭىراۋ شالىپ نەمەسە @infokazakhstan تەلەگرام-بوتى ارقىلى سۇراقتارىڭىزدى قويۋعا بولادى، - دەدى شقو كاسىپكەرلەر پالاتاسىنىڭ كاسىپكەرلەر قۇقىعىن قورعاۋ جانە اكىمشىلىك كەدەرگىلەردى ازايتۋ ءبولىمىنىڭ باسشىسى باقىتجان مايجەرينوۆ.
