ترامپ اكىمشىلىگىنىڭ شەنەۋنىگىنە قازاقتىڭ قامشىسىن قولدانىپ، قول استىنداعىلارعا "زورلىق-زومبىلىق جاساعانى" ءۇشىن شاعىم تۇسكەن. "قامشى" ءتىلشىسى The Washington Post باسىلىمىنىڭ دەرەگىن نەگىزگە الا وتىرىپ، ترامپ اكىمشىلىگىندەگى ەتيكەت پەن حاتتامالارعا جاۋاپتى ىشكى بولىمشەدەگى قىزمەتكەرلەر كەيبىر قۇقىقبۇزۋشىلىقتار ءۇشىن شاعىمدانعانىن حابارلايدى. شاعىمدار تۋرالى باياندامانى مەملەكەتتىك دەپارتامەنتتىڭ ىشىندەگى باقىلاۋشىلار (Watchdog) جاريالاعان.

بايانداما بويىنشا، ترامپ اكىمشىلىگىنە قاراستى حاتتامالار ءبولىمىنىڭ بۇرىنعى باسشىسى شون لوۋلەر "جۇمىس ورنىنداعى زورلىق-زومبىلىق" دەپ ساناۋعا بولاتىن ارەكەتتەر  جانە قىزمەتتىك ەتيكەتكە قايشى ىستەر جاساعان.

اقپاراتقا سايكەس، لوۋلەر كەڭسەسىندە تۇرعان قازاقتىڭ قامشىسىن قولدانىپ، قىزمەتكەرلەرگە قىر كورسەتكەن. باسىلىمنىڭ جازۋىنشا، باسشىنىڭ قامشىسىن قازاقستاننان كەلگەن ديپلوماتتار سىيعا بەرگەن. 

"زارداپ شەكتى" دەلىنگەن قىزمەتكەرلەر The Washington Post-كە بەرگەن سۇحباتىندا لوۋلەردىڭ گەي قىزمەتكەرلەردى كەمسىتىپ، ولارعا قۇرمەتسىزدىك تانتقانىن جەتكىزگەن. مەملەكەتتىك دەپارتامەنتتىڭ ەكى قىزمەتكەرىنىڭ ايتۋىنشا، بۇرىنعى باسشى كايل ەسىمدى گەي قىزمەتكەردى "كايلي" دەپ كەمسىتىپ شاقىرعان.

قىزمەتكەرلەردىڭ سوزىنشە، لوۋلەر جاپون ديپلوماتتارىنىڭ توبى "گەي جۇلدىزدارىنا ۇقسايتىنىن" ايتىپ، ولاردىڭ سىيلىقتارىن قالامايتىنىن جەتكىزگەن.

قىزمەتكەرلەر "لوۋلەر باسقا دا قورلايتىن پىكىرلەر ايتتى" دەپ مالىمدەگەن. شاعىمدانۋشىلاردىڭ سوزىنشە، ءبىر توپ تۇرىك ازاماتتارى حاتتامالار كەڭسەسىنە كەلگەننەن كەيىن لوۋلەر  ولاردى "لاس" ادامدار سياقتى "جيىركەنىشتى" دەگەن.

دەگەنمەن، مەملەكەتتىك دەپارتامەنت باسشىلىعى باياندامانىڭ تۇجىرىمدارىن قاتاڭ تۇردە جوققا شىعاردى جانە جانە باقىلاۋشىلاردىڭ اقپاراتتارىنا كۇمان كەلتىردى.

گازەتتىڭ اقپاراتىنا سايكەس، لوۋلەر حاتتاما باسشىسى قىزمەتىنەن بوساتىلعان.