پرەزيدەنت قاسىم-جومارت توقايەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆتى قابىلدادى، دەپ حابارلادى اقوردا.
اليك شپەكبايەۆ پرەزيدەنتكە سىبايلاس جەمقورلىققا قارسى ءىس-قيمىل اگەنتتىگىنىڭ بيىل 7 ايدا اتقارعان جۇمىستارى جايلى قورىتىندى ەسەپ بەردى. ول مەملەكەتتىك قىزمەتكەرلەر مەن جاۋاپتى باسشىلاردىڭ سىبايلاس جەمقورلىققا قارسى شارا قولدانباعانى ءۇشىن قىزمەتىنەن بوساتىلۋى تۋرالى ايتتى. سونداي-اق نورماتيۆتىك-قۇقىقتىق اكتىلەردى جەمقورلىققا قارسى ساراپتامادان وتكىزۋدى قالپىنا كەلتىرۋگە قاتىستى توقايەۆتىڭ بۇعان دەيىن بەرگەن تاپسىرمالارىنىڭ ورىندالۋىن باياندادى.
"پرەزيدەنت مەملەكەتتىك ورگانداردىڭ جۇمىسىنا قىزمەت كورسەتۋ مودەلىن ەنگىزۋدىڭ ماڭىزدىلىعىن اتاپ ءوتىپ، اگەنتتىكتىڭ ازاماتتىق قوعام وكىلدەرىمەن بىرگە سىبايلاس جەمقورلىقتىڭ الدىن الۋ جانە ادالدىق يدەولوگياسىن ىلگەرىلەتۋ جونىندەگى ءىس-قيمىلدارىنا وڭ باعا بەردى" دەلىنگەن حابارلامادا.
كەزدەسۋ سوڭىندا توقايەۆ 19 تامىز كۇنى سىبايلاس جەمقورلىققا قارسى ءىس-قيمىل جونىندەگى كەڭەستە بەرگەن تاپسىرمالارىن تەزىرەك جۇزەگە اسىرۋ قاجەت ەكەنىن ايتتى. ول كەڭەستە جەمقورلىق قىلمىستار ءۇشىن جاۋاپكەرشىلىكتى قاتاڭداتىپ، قوعامدىق باقىلاۋدىڭ تيىمدىلىگىن ارتتىرۋعا قاتىستى تاپسىرمالار بەرگەن.
پىكىر قالدىرۋ