جازعى دەمالىس كەزىندە وقۋ مەكەمەلەرى بالالارعا جاڭا فورماتتا ءبىلىم بەرۋگە دايىندالدى. كومەكشى ماتەريالداردىڭ ازىرلەنگەنى تۋرالى اقپارات شقو اكىمىنىڭ قاتىسۋىمەن وتكەن ءبىلىم بەرۋ قىزمەتكەرلەرىنىڭ ءداستۇرلى تامىز كونفەرەنسياسىندا بەلگىلى بولدى.
شقو ءبىلىم باسقارماسىنىڭ باسشىسى سايرانگۇل ءجۇمادىلوۆا جاڭا وقۋ جىلىندا وقۋشىلاردىڭ سانى وتكەن جىلمەن سالىستىرعاندا ءبىر جارىم مىڭعا ارتىپ، 189 مىڭ بالادان اسقانىن اتاپ ءوتتى. ولاردىڭ جارتىسى قاشىقتىقتان ساباق وقيدى.
ونلاين ساباقتى ساپالى جۇرگىزۋ ءۇشىن ءبىلىم ورتاسى قۇرىلىپ، كومپيۋتەرمەن قامتاماسىز ەتۋ جانە ينتەرنەتكە قوسۋ ماسەلەلەرى شەشىلۋدە.
وقۋ جىلى باستالماس بۇرىن وبلىستاعى مۇعالىمدەر پەداگوگيكالىق شەبەرلىك ورتالىعىندا 40 ساعاتتىق اسينحروندالعان ونلاين كۋرستان ءوتتى. كۋرس بارىسىندا سيفرلىق پلاتفورمانى قولدانۋدى مەڭگەرىپ قايتتى.
بۇدان بولەك، پەداگوگتارعا كومەك رەتىندە 1200 ساباقتان تۇراتىن سيفرلىق ءبىلىم كونتەنتى ازىرلەندى.
"ورلەۋ" بىلىكتىلىكتى ارتتىرۋ ۇلتتىق ورتالىعىنىڭ وبلىستىق فيليالى پەداگوگتارمەن بىرگە 8-9 سىنىپ وقۋشىلارىنا ارنالعان گەومەتريا، فيزيكا، بيولوگيا، ورىس ءتىلى جانە ادەبيەتى پاندەرى بويىنشا 304 بەينەساباقتى ازىرلەدى.
اعىمداعى كەزەڭدە وسكەمەن مەن سەمەي قالالارىنداعى مەكتەپتەردە 82 پەداگوگتىڭ قاتىسۋىمەن 272 ساباق شىعارىلدى.
قاشىقتىقتان ءبىلىم بەرۋ ماقساتىندا وبلىستا ءۇش مىڭ استام ساباقتىڭ بەينە كىتاپحاناسى جاسالدى. ال پەداگوگتارعا ارنالعان ەكى مىڭنان استام ۆەبينار ۇيىمداستىرىلدى.
شاعىن كومپلەكتىلى 373 مەكتەپتە شتاتتىق رەجيمدە 41 986 بالا ءبىلىم الادى. وقۋ ەكى اۋىسىمدا ۇيىمداستىرىلادى. اۋىسىم كەزىندە جارتى ساعاتتىق ءۇزىلىس بولىپ، ءاربىر ساباقتان سوڭ دەزينفەكسيالاۋ جۇمىستارى جۇرگىزىلەدى. مەكتەپتەردە بەتپەردە (ماسكا) كيۋ رەجيمى ساقتالىپ، مەديسينالىق باقىلاۋ كۇشەيتىلەدى.
ايماق باسشىسى دانيال احمەتوۆ بالالاردىڭ دەنساۋلىعىن ساقتاۋ ءۇشىن مەكتەپتەردەگى قاۋىپسىزدىك
شارالارىن قاتاڭ ساقتاۋدى تاپسىردى. سونداي-اق دەزينفەكسيالىق جانە سانيتارلىق قاۋىپسىزدىك قۇرالدارىمەن قامتاماسىز ەتۋدى، تەپلوۆيزورلار مەن سانيتايزەرلەر، كىرەبەرىستەگى قورعانىس كىلەمشەلەرىن جانە بەتپەردەمەن (ماسكا)، باكتەريسيدتى شامدارمەن قامتۋدى باقىلاۋعا الۋدى جۇكتەدى.
پىكىر قالدىرۋ