الماتىدا №4 قالالىق كلينيكالىق اۋرۋحانانىڭ حيرۋرگيا ءبولىمىنىڭ مەڭگەرۋشىسى بولات ءتۇسىپحانوۆ قايتىس بولدى. بۇل تۋرالى الماتى قالاسى قوعامدىق دەنساۋلىق باسقارماسىنىڭ باسپا ءسوز قىزمەتى حابارلادى.
"بولات ءتۇسىپحانوۆتىڭ كەنەتتەن قايتىس بولۋى مەديسينا ءۇشىن ورنى تولماس قايعى. الماتى قوعامدىق دەنساۋلىق باسقارماسى ۇجىمى بولات اسىلحان ۇلىنىڭ وتباسى مەن جاقىندارىنا قايعىرىپ كوڭىل ايتادى" دەلىنگەن حابارلامادا.
بولات اسىلحان ۇلى – №4 قالالىق كلينيكالىق اۋرۋحانانادا 2018 جىلدان بەرى جۇمىس ىستەگەن جوعارى ساناتتى دارىگەر.
ول ماۋسىم ايىندا تۋىستارىنا ءقاۋىپتى ىندەتتەن ساقتانۋعا اۋديوحابارلاما جولداعان. كەيىننەن جىبەرگەن اۋديوحابارلاماسى الەۋمەتتىك جەلىدە كەڭىنەن تاراپ، حالىق اراسىندا رەزونانس تۋدىردى.
ەسكە سالا كەتەيىك، اۋديودا ەكى حيرۋرگ ناۋقاستارمەن بايلانىستا بولىپ، اۋىرىپ قالعان. ءبىر دارىگەر جانساقتاۋ بولىمىندە ارەڭ ەسىن جيعانىن، ەكىنشىسىنىڭ جاعدايى ءالسىز ەكەنى ايتىلعان.
"اۋرۋحانا ناۋقاستارعا تولى، جانساقتاۋ بولىمىندە ورىن جوق. مەديسينالىق اپپاراتتار دا جەتكىلىكسىز. بۇل شىندىق. جاعدايى ورتاشا اۋىر ناۋقاستار ۇيلەرىندە قالۋعا ءماجبۇر. ءدارى دە بەرىلمەيدى. سوندىقتان دەنساۋلىقتارىڭىزدى كۇتىپ، ابايلاڭىزدار" دەلىنگەن اۋديوجازبادا.
پىكىر قالدىرۋ