الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا الماتى قالاسى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى – قالانىڭ باس مەملەكەتتىك سانيتار دارىگەرى جانداربەك بەكشين جانە الماتى قالاسى قوعامدىق دەنساۋلىق ساقتاۋ باسقارماسىنىڭ باستىعى كامالجان نادىروۆ سوڭعى اقپاراتتارمەن ءبولىستى.

«نەگىزگى رەپرودۋكتيۆتى سان – بۇل اۋرۋ ادامنىڭ قانشا ادامعا اۋرۋ جۇقتىرعانىن كورسەتەتىن كورسەتكىش. ىندەتتىڭ ءورشىپ تۇرعان كەزىندە بۇل كورسەتكىش 4،7%-دان اسقان، ياعني ءبىر ادام ءتورت ادامعا دەيىن جۇقتىرۋى مۇمكىن دەگەن ءسوز. بۇگىنگى تاڭدا بۇل كورسەتكىش 0،9% تومەندەدى. ياعني، بۇل كورسەتكىشتىڭ كەمىگەنى-اۋرۋدىڭ تارالۋ دەڭگەيى ازايعانىن جانە ەپيدەميانىڭ ءقاۋىپى تومەندەگەنىن بىلدىرەدى»، — دەپ حابارلادى ج. بەكشين.

ول سونىمەن قاتار، قالانىڭ ەپيدەميولوگتارى تاراپىنان اۋرۋدىڭ سەبەپ-سالدارلىق بايلانىسىنا زەرتتەۋ جۇرگىزىپ جاتقاندىعىن ايتتى. زەرتتەۋ ناتيجەسى بويىنشا، 49،7% جاعدايدا ادامدار ناۋقاسپەن جۇمىستا، 19،5% جاعدايدا ناۋقاسپەن ۇيدەگى وشاق بويىنشا بايلانىستا بولعان. تەك 0،1% جاعدايدا عانا ناۋقاسپەن بايلانىس ستاسوناردا بولعاندىعى انىقتالدى.
بۇگىنگى تاڭدا قالادا مەديسينا باقىلاۋىندا تۇرعان، ءۇي كارانتينىن ساقتاۋى ءتيىس 1389 بەلسەندى وشاقتار بار. ول جەرلەردە مەديسينالىق باقىلاۋ جۇرگىزۋ، سونىمەن بىرگە ءۇي كارانتينى جالعاسۋدا. ەپيدەميولوگتار اۋرۋمەن بايلانىستا بولعان ادامداردىڭ سانىن انىقتادى. ول ادامدار ءقازىر قاتاڭ باقىلاۋدا.

«ءبىز ۇيدە كارانتيندە وتىرعان ادامداردى باقىلايتىن شارالار ەنگىزدىك. كارانتين رەجيمىن ساقتاۋى ءتيىس الامدار سانى 1300-گە جەتتى. باقىلاۋ قوڭىراۋ شالۋ ارقىلى جۇزەگە اسىرىلادى. مونيتورينگتىك توپتار ۇيگە دە بارادى جانە زاڭ بۇزۋشىلىقتار انىقتالعان جاعدايدا، ياعني ەگەر ولار ءۇي كارانتينىندە بولماسا، اكىمشىلىك شارالار قولدانىلاتىن بولادى»، — دەدى ج. بەكشين.

ول ەگەر ۇيدە كارانتين رەجيمىن بۇزعان ادامنىڭ باسقا ادامدارعا اۋرۋ جۇقتىرعانى انىقتالسا، وندا سوڭعى بايلانىستا بولعان ادامعا قىلمىستىق جازا قاراستىرىلعانىن اتاپ ءوتتى.

«كارانتيندىك ستاسيونارعا وقشاۋلاۋ رەجيمىن بۇزۋشىلار عانا ەمەس، سونىمەن قاتار ۇيدە كارانتيندە وتىرعاندار دا ءوز ەركىمەن جۇگىنە الادى. ەگەر ۇيدە وقشاۋلانۋدىڭ ەشقانداي مۇمكىندىگى بولماسا نەمەسە ۇيدە ءالسىز توپتاعى ادامدار بولسا، وندا ءوز ەركىمەن وقشاۋلاۋ اۋرۋحاناسىنا ورنالاسۋعا ءوتىنىش بەرە الادى»، — دەپ تولىقتىردى سپيكەر.

اتالعان الدىن الۋ شاراسى ۇيدەگى كارانتين رەجيمىن بۇزۋدى توقتاتۋ ءۇشىن جاسالىپ وتىرعانىن اتاپ ءوتتى.

ج. بەكشيننىڭ ايتۋىنشا، بۇعان قالا تۇرعىندارىنىڭ وتىنىشتەرى سەبەپ بولعان. ويتكەنى ۇيدە كارانتيندە وتىرۋعا ءتيىس جاندار ۇيدە وتىرماعان. جاقىندا ەكى جۇزگە جۋىق ءۇي تەكسەرىلىپ، وندا 23 ناۋقاستىڭ جوق ەكەندىگى انىقتالدى.

«بۇل شارالار اۋرۋدىڭ تارالۋ تىزبەگىنە اسەر ەتەدى دەپ سەنەمىز. سوڭعى ايدا اۋرۋ دەڭگەيىنىڭ تاۋلىكتىك ءوسىمى 4،2% -دان 1،4% -عا دەيىن تومەندەدى»، — دەپ اتاپ ءوتتى ج. بەكشين.

اعىمداعى جىلدىڭ 7 تامىزىنداعى سوڭعى اقپارات بويىنشا الماتى قالاسىندا كوروناۆيرۋس جۇقتىرۋدىڭ 12 997 جاعدايى تىركەلدى، ونىڭ ىشىندە 7 897-ىندا سيمپتوم راستالسا، 5110-ى سيمپتومسىز جاعداي.