زەينەتاقى قورىنداعى جيناقتارىنىڭ بولىگىن كىمدەر پايدالانا الاتىنىن  ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ پرەزيدەنت جولداۋىن ىسكە اسىرۋ جونىندەگى شارالار تۋرالى بريفينگتە حابارلادى.

مينيستر زەينەتاقى جيناقتارىنىڭ ءبىر بولىگىن تۇرعىن ءۇي جاعدايىن جاقسارتۋعا، ەمدەلۋگە جانە قارجى كومپانيالارىنا باسقارۋ ءۇشىن اۋدارۋعا بەرىلەتىنىن ايتتى. سونداي-اق جيناقتارىنىڭ ءبىر بولىگىن كىمدەر قانداي جاعدايدا الا الاتىنىن اتاپ ءوتتى.

–  بىرىنشىدەن، جۇمىس ىستەگەن، جۇمىس ىستەپ جۇرگەن ازاماتتار، ياعني ءبىرىڭعاي زەينەتاقى قورىندا جارنالارى بار ازاماتتار. ەگەر دە ولاردىڭ جينالعان سوماسى جەتكىلىكتى شەگىنەن اسىپ جاتسا. بۇل جەردە نەگىزگى قاعيدات زەينەتاقى قورىندا جينالعان اقشالارىمىزدى بولاشاق جيناقتاۋشى زەينەتاقى قورىنان الاتىن تولەمدەرگە ارنالعان. پرەزيدەنت ايتپاقشى، ماقسات – ءبارىن تاراتىپ بەرۋ ەمەس. ءبىر بولىگى قالۋى ءتيىس. مۇنداي ادامدار 530 مىڭدى قۇرايدى.

ەكىنشىدەن، زەينەت جاسىنا جەتكەن ادامدار ولاردىڭ جيناقتاۋشى قورىندا قاراجاتى بار بولسا، ول كىسىلەر 50 پايىزىنا دەيىن الا الادى. مۇنداي كىسىلەردىڭ سانى 178 مىڭنان اسادى. ونىڭ ىشىندە قۇقىق قورعاۋ ورگاندارىنىڭ زەينەتكەرلەرىنە دە تاراتىلىپ بەرىلەدى، – دەدى مينيستر.

ونىڭ ايتۋىنشا، بۇل جەردە ءبىر عانا شارت بولادى. زەينەتكە شىققان ازاماتتاردىڭ مەملەكەتتەن الىپ وتىرعان زەينەتاقىسىن قوسقان كەزدە ونىڭ زەينەتكە شىققان كەزدەگى تابىسىنىڭ كەمىندە 40 پايىزىنان تومەن بولماۋى كەرەك. بۇگىنگى كەزدە ەلىمىزدە بۇل كورسەتكىش 63 پايىزعا جەتىپ وتىر.

– ءۇشىنشىسى زەينەتاقىلىق اننۋيتەتتى راسىمدەگەن ازاماتتاردىڭ جيناقتاۋشى قورىنان ساقتاندىرۋ قورىنا اۋدارعاننان كەيىن قوردا قاراجاتتارى قالعان بولسا، ولاردى تولىعىمەن الۋعا بولادى. مۇنداي 13 300 ازامات بار.

جالپى وسى مۇمكىندىكتەردى 721 مىڭ قازاقستاندىق پايدالانا الادى، – دەدى ول.