مەملەكەت باسشىسى قاسىم-جومارت توقايەۆ ىشكى ىستەر ءمينيسترى ەرلان تۇرعىمبايەۆتى قابىلدادى. بۇل تۋرالى اقوردا حابارلادى.
قاسىم-جومارت توقايەۆقا پرەزيدەنتتىڭ بيىلعى قازاقستان حالقىنا ارناعان "جاڭا جاعدايداعى قازاقستان: ءىس-قيمىل كەزەڭى" جولداۋىن جۇزەگە اسىرۋ، اتاپ ايتقاندا، توتەنشە جاعداي كوميتەتىن ىشكى ىستەر مينيسترلىگىنىڭ قۇرامىنان ءبولۋ جۇمىستارى جايىندا باياندالدى.
ءمينيستردىڭ ايتۋىنشا، بۇگىندە ارنايى كوميسسيا قۇرىلىپ، الداعى ۋاقىتتا توتەنشە جاعدايلار جونىندەگى مينيسترلىكتىڭ قۇرامىندا قىزمەت ەتەتىن 25 مىڭعا جۋىق ادامنىڭ ءتىزىمى ناقتىلانىپ، قاجەتتى تەحنيكالار مەن قۇرال-جابدىقتار ءبولىنىپ جاتىر. بۇل جۇمىستاردىڭ بارلىعى ءبىر ايدىڭ ىشىندە اياقتالادى.
سونىمەن قاتار ەرلان تۇرعىمبايەۆ "پوليسيا قادامدىق قولجەتىمدىلىكتە" قاعيداتى بويىنشا رەفورمالاۋ جۇمىسىنىڭ بارىسى تۋرالى ايتتى. مينيستر اتالعان قاعيدات بويىنشا جەرگىلىكتى پوليسيا قىزمەتكەرلەرى ماتەريالدىق تۇرعىدان تولىق جابدىقتالىپ، ولاردىڭ رەسپۋبليكانىڭ بارلىق اۋماعىندا حالىقپەن تىعىز جۇمىس ىستەۋىنە وڭتايلى جاعداي جاسالاتىنىن جەتكىزدى. وسى ماقساتتا ۋچاسكەلىك پوليسيا قىزمەتكەرلەرىنىڭ مارتەبەسى زاڭمەن بەكىتىلىپ، ولار اۆتوكولىكپەن، فوتو-ۆيدەو باقىلاۋ قۇرىلعىلارىمەن، ەلەكتروندى پلانشەتتەرمەن قامتاماسىز ەتىلەدى.
بۇدان بولەك كەزدەسۋدە ىشكى ىستەر مينيسترلىگىنىڭ جۇمىسىن سيفرلاندىرۋ ماسەلەسى دە قوزعالدى. ءقازىردىڭ وزىندە مينيسترلىك جۇمىسىنىڭ 83% ەلەكتروندى فورماتقا كوشكەن. جىل سوڭىنا دەيىن بۇل مەجەنى 91% جەتكىزۋ كوزدەلىپ وتىر.
كەزدەسۋ سوڭىندا پرەزيدەنت قاسىم-جومارت توقايەۆ ەرلان تۇرعىمبايەۆقا قولعا العان رەفورمالاردى ناتيجەلى ىسكە اسىرۋ كەرەك ەكەنىن ايتىپ، مينيسترلىكتىڭ الدىنا ناقتى مىندەتتەر قويدى.
پىكىر قالدىرۋ