الماتىدا اباي كۇنىنە وراي وقۋشىلار اراسىندا ولەڭ وقۋدان ونلاين جارىس ءوتىپ جاتىر. بايقاۋعا 8 اۋداننان 100-دەن اسا ادام قاتىسقان. وعان قوسا، قالا اكىمدىگى تۇڭعىش رەت حاكىمنىڭ قارا سوزدەرىن بىرىنەن-بىرى ءىلىپ الىپ كەتەتىن ەستافەتانى باستادى.

24 جاستاعى باحتينۇر بولاشاق تەراپيەۆت دارىگەر. ءقازىر جەدەل جاردەم قىزمەتىندە جۇمىس ىستەيدى. پوەزياعا دەگەن ىقىلاسى 2-سىنىپتان باستالعان. سودان بەرى ابايدىڭ ولەڭدەرىن وقىپ، جاتتاعاندا جانى سۇيەدى. اباي وقۋلارىنا دا قاتىسىپ، باعىن سىناپ كورگەن. جۇلدەلى ورىنعا جەتپەسە دە، باحتينۇر سۇيىكتى ءىسىن تاستاعان ەمەس. رۋحاني قۇندىلىقتى دارىپتەيتىن اباي كۇنى بولعانى ءۇشىن قۋانادى.

«قازىرگى جاستاردا قۇندىلىق باسقا نارسە بولىپ كەتىپ جاتىر. اباي كۇنىن بەلگىلەگەنى وتە دۇرىس دەپ سانايمىن. سەبەبى، وسى كۇن ارقىلى جاستارىمىز پوەزيانى بىلۋگە نەمەسە اقىندارىمىزدى بىلۋگە، ولاردى دارىپتەۋگە ات سالىسىپ، سوعان كۇش شىعارىپ، ەڭ بولماسا ەسكە الىپ تۇراتىن كۇن بولادى»، – دەدى قازاقستان ۇيعىر جاستار بىرلىگىنىڭ مۇشەسى باحتينۇر سىدىقوۆا.

ۇلتى ورىس گالينا قازاقشاعا سۋداي. سەمەيدىڭ تۋماسى قاسيەتتى ءوڭىردىڭ قاسيەتى ەرتە جاستان بويىنا بىتكەن دەيدى. كەمەڭگەر تۇلعانىڭ شىعارماسىن جەتىك ءبىلۋ ءار ازاماتتىڭ پارىزى دەپ بىلەدى. مەكتەپ قابىرعاسىنان باستاپ جوعارى وقۋ ورنىندا دا ابايدىڭ ولەڭدەرىن وقۋدان سايىسقا ءتۇسىپ كەلەدى.

«جاستايىمنان مەنى اتام ادەبيەتكە يتەرمەلەپ، قۇلشىنىسىمدى وياتتى. قازاق تىلىندە ابايدىڭ ولەڭىن وقىپ، ارى قاراي نەشە ءتۇرلى سايىستارعا قاتىسقاندا ءوزىمنىڭ تالپىنىسىمدى بىلدىرەتىنمىن. مەن 10-نان استام ولەڭىن جاتقا بىلەمىن. وقىسام كوبىن ەسكە تۇسىرە الامىن. سايىسقا قاتىسقاندا قارا سوزدەرىنىڭ شۋماقتارىن دا جاتتاپ تۇراتىنمىن»، – دەدى ورىس ۇلتتىق مادەني ورتالىعىنىڭ مۇشەسى گالينا دۋراچەنكو.

ايتا كەتەيىك، الماتىدا 1995ء-شى جىلدان باستاپ مەكتەپ وقۋشىلارى اراسىندا "اباي وقۋلارى" وتەدى. جىل سايىن سايىسقا مىڭنان اسا ادام قاتىسادى. بايقاۋدى جوعارى وقۋ ورىندارىنان، تەاتردان كەلگەن وكىلدەر ءادىلقازىلىق ەتەدى. ال بيىل "اباي كۇنىندە" قالا اكىمدىگى پاندەمياعا بايلانىستى ونلاين جارىس ۇيىمداستىردى.

«ەندى 10 تامىز اباي كۇنى بولىپ بەلگىلەنگەننەن كەيىن ارينە، ۇلكەن ءبىر قازاقتىڭ رۋحىن كوتەرەتىن كەرەمەت ءبىر اتالىپ وتەتىن كۇن بولۋ كەرەك. بالالار وزدەرى وقىعان ۆيدەونى جۇكتەپ، بىزگە جىبەرەدى. اۋدان باسشىلارىنا جىبەرەدى. اۋدانداعى كەزەگى وتكەن سوڭ اۋداننىڭ جەڭىمپازىن قالالىق كەزەڭگە جىبەرەدى. داۋىس بەرۋ ارقىلى جەڭىمپازدى انىقتايتىن بولامىز. ەشقانداي، ەشكىمنىڭ كومەگى قاجەت بولمايدى»، – دەدى قالالىق ءبىلىم باسقارماسىنىڭ ءبولىم باسشىسى نۇرگۇل تاۋ.

ونلاين جارىس جەڭىمپازىنا پلانشەت سىيعا بەرىلەدى دەيدى ۇيىمداستىرۋشىلار. ال حاكىمنىڭ قارا سوزدەرىن وقۋ ەستافەتاسىنا كەز كەلگەن ۇيىم قاتىسا الادى. مۇنداعى ماقسات، عالامتورعا تەلمىرگەن جاستارعا 45 ءسوزدى جاتتاتقىزۋ دەيدى.