پرەزيدەنت قاسىم-جومارت توقايەۆ ەلدە ەكى جاڭا ۆەدومستۆو قۇرۋ جونىندەگى جارلىققا قول قويدى، دەپ حابارلايدى اقوردا.

"قازاقستان رەسپۋبليكاسى كونستيتۋسياسىنىڭ 44-بابىنىڭ 5) تارماقشاسىنا سايكەس مەملەكەتتىك باسقارۋ جۇيەسىن جاڭعىرتۋ جانە ونىڭ تيىمدىلىگىن ارتتىرۋ ماقساتىندا قاۋلى ەتەمىن:    

1. مىنالار:       

1) قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار اگەنتتىگى قۇرىلسىن، وعان ستراتەگيالىق جوسپارلاۋ جانە مەملەكەتتىك ستاتيستيكالىق قىزمەت سالالارىنداعى قازاقستان رەسپۋبليكاسى ۇلتتىق ەكونوميكا  مينيسترلىگىنىڭ  فۋنكسيالارى مەن وكىلەتتىكتەرى بەرىلە وتىرىپ، مىناداي: 

رەفورمالاردى جۇزەگە اسىرۋ تاسىلدەرىن، رەفورمالاردى جۇزەگە اسىرۋعا قاجەتتى، سونداي-اق ولاردىڭ ىسكە اسىرىلۋ بارىسىن مونيتورينگتەۋ مەن باعالاۋ  بويىنشا نورماتيۆتىك قۇقىقتىق اكتىلەر جوبالارىن ازىرلەۋ؛

مەملەكەتتىك جوسپارلاۋ جۇيەسىنىڭ قۇجاتتارىن دايىنداۋ كەزىندە، سونداي-اق ولاردى كەلىسۋ، ىسكە اسىرۋ بارىسىن مونيتورينگتەۋ مەن باعالاۋ بويىنشا مەملەكەتتىك ورگانداردىڭ جانە كۆازيمەملەكەتتىك سەكتور سۋبەكتىلەرىنىڭ قىزمەتىن ۇيلەستىرۋ؛

مەملەكەتتىك ورگانداردىڭ مەملەكەتتىك باسقارۋ جۇيەسىن جەتىلدىرۋگە باعىتتالعان ۇسىنىستارىن كەلىسۋ؛

ەلدىڭ دامۋى مەن حالىقارالىق احۋالدى ستراتەگيالىق بولجامداۋ مەن  تالداۋ جۇرگىزۋ؛

ۆەدومستۆولىق ستاتيستيكا سالاسىنداعى جۇمىستى  ۇيلەستىرۋ؛

ورتالىق مەملەكەتتىك ورگاندار جانە وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ جەرگىلىكتى اتقارۋشى ورگاندارى قىزمەتىنىڭ تيىمدىلىگىنە جىل سايىنعى باعالاۋ جۇرگىزۋ بويىنشا جۇمىستاردى ۇيلەستىرۋ جونىندەگى فۋنكسيالار مەن وكىلەتتىكتەر بەرىلسىن؛

2) قازاقستان رەسپۋبليكاسىنىڭ  باسەكەلەستىكتى قورعاۋ جانە دامىتۋ اگەنتتىگى قۇرىلسىن، وعان ءتيىستى تاۋار نارىقتارىندا باسەكەلەستىكتى قورعاۋ جانە مونوپوليستىك قىزمەتتى شەكتەۋ، مەملەكەتتىك مونوپوليا سالاسىنا جاتقىزىلعان قىزمەتتى باقىلاۋ مەن رەتتەۋ سالاسىنداعى قازاقستان رەسپۋبليكاسى ۇلتتىق ەكونوميكا مينيسترلىگىنىڭ  فۋنكسيالارى مەن وكىلەتتىكتەرى بەرىلسىن.

2. قازاقستان رەسپۋبليكاسىنىڭ ۇكىمەتى:

1) قازاقستان رەسپۋبليكاسى پرەزيدەنتىنىڭ اكىمشىلىگىمەن كەلىسۋ بويىنشا مەملەكەتتىك ورگاندار مەن ولارعا ۆەدومستۆولىق باعىنىستى ۇيىمداردىڭ شتات سانىن قايتا ءبولۋدى؛

2) قازاقستان رەسپۋبليكاسى ۇلتتىق ەكونوميكا مينيسترلىگىنىڭ ستاتيستيكا كوميتەتىن ءتيىستى شتات سانىمەن بىرگە قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار اگەنتتىگىنىڭ قاراۋىنا بەرىپ، ونى كەيىننەن ۇلتتىق ستاتيستيكا بيۋروسى ەتىپ قايتا قۇرۋدى؛

3) وسى جارلىقتى ىسكە اسىرۋ بويىنشا وزگە دە شارالاردى قابىلداۋدى قامتاماسىز ەتسىن.

3. قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار اگەنتتىگى مەن قازاقستان رەسپۋبليكاسىنىڭ باسەكەلەستىكتى قورعاۋ جانە دامىتۋ اگەنتتىگى بەرىلەتىن فۋنكسيالار مەن وكىلەتتىكتەر شەگىندە قازاقستان رەسپۋبليكاسى ۇلتتىق ەكونوميكا مينيسترلىگىنىڭ قۇقىقتارى مەن مىندەتتەمەلەرىنىڭ قۇقىقتىق ميراسقورلارى بولىپ ايقىندالسىن.

4. "قازاقستان رەسپۋبليكاسى پرەزيدەنتىنىڭ اكىمشىلىگى تۋرالى ەرەجەنى بەكىتۋ  تۋرالى" قازاقستان رەسپۋبليكاسى پرەزيدەنتىنىڭ 2008 جىلعى
11 ناۋرىزداعى № 552 جارلىعىنا (قازاقستان رەسپۋبليكاسىنىڭ ءپۇاج-ى، 2008 ج.، № 12-13، 116-قۇجات) مىناداي تولىقتىرۋ ەنگىزىلسىن:

جوعارىدا اتالعان جارلىقپەن بەكىتىلگەن قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ تىزبەسى:

مىناداي مازمۇنداعى جولدارمەن تولىقتىرىلسىن:

"قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار اگەنتتىگى"؛

"قازاقستان رەسپۋبليكاسىنىڭ باسەكەلەستىكتى قورعاۋ جانە دامىتۋ اگەنتتىگى".

5. قازاقستان رەسپۋبليكاسى پرەزيدەنتىنىڭ اكىمشىلىگى ءبىر اي مەرزىمدە:

1) قازاقستان رەسپۋبليكاسى پرەزيدەنتىنىڭ قاراۋىنا:

قۇرىلعان قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار مەن  قازاقستان  رەسپۋبليكاسىنىڭ  باسەكەلەستىكتى قورعاۋ جانە دامىتۋ اگەنتتىكتەرىنىڭ توراعالارىمەن بىرلەسىپ، قۇرىلعان اگەنتتىكتەر مەن ولاردىڭ قۇرىلىمدارى تۋرالى ەرەجەلەردىڭ جوبالارىن؛

قازاقستان  رەسپۋبليكاسىنىڭ  ۇكىمەتىمەن  بىرلەسىپ، قايتا  ۇيىمداستىرىلاتىن  مەملەكەتتىك  ورگانداردان شتات سانىن قۇرىلعان اگەنتتىكتەرگە قايتا ءبولۋ، سونداي-اق ولاردىڭ قىزمەتكەرلەرىنىڭ ەڭبەگىنە اقى تولەۋ جۇيەسى جونىندە ۇسىنىستار ەنگىزسىن؛

2) وسى جارلىقتى ىسكە اسىرۋ بويىنشا وزگە دە شارالاردى قابىلداسىن.

6. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

7. وسى جارلىق قول قويىلعان كۇنىنەن باستاپ قولدانىسقا ەنگىزىلەدى" دەلىنگەن رەسمي سايت جاريالاعان جارلىقتا.