پاندەميا تۋدىرعان ەكونوميكالىق داعدارىس سالدارىنان قازاقستاننىڭ جالپى ىشكى ءونىمى ءبىرىنشى جارتىجىلدىقتا 1،8%-عا تومەندەدى. دەگەنمەن كەي سالالاردا تۇراقتى ءوسىم بايقالۋدا. مىسالى، كولىك سالاسى 14،6%-عا، ساۋدا 10،6%-عا قۇلدىراعانىمەن، اۋىل شارۋاشىلىعى 2،4%-عا ءوستى.
مەملەكەتتىك دامۋ ينستيتۋتتارى، ونىڭ ىشىندە «قازاگرو» اۋىل شارۋاشىلىعىنىڭ تۇراقتىلىعىن ساقتاۋدا ماڭىزدى ءرول اتقارادى. اگروونەركاسىپ كەشەنىن نەسيەلەۋدەگى حولدينگتىڭ ۇلەسى، 2019 جىلدىق ەسەبىنە سايكەس، سوڭعى ەكى جىلدا 83% مولشەرلىك دەڭگەيدە قالدى.
«قازاگرو» توبىنداعى كومپانيالار فەرمەرلەر مەن اۋىلشارۋاشىلىق ونىمدەرىن قايتا وڭدەۋ كاسىپورىندارىنا تۇراقتى قارجىلاندىرۋدا. مىسالى، 2020 جىلدىڭ التى ايىندا «اگرارلىق نەسيە كورپوراسياسى» 148،4 ملرد.تەڭگەگە 4913 فەرمەردى قارجىلاندىردى.
اگروونەركاسىپتىڭ ءارتۇرلى سالالارىنداعى كومپانيالار قولداۋ مەن دامىتۋعا قاراجات الۋدا. ماسەلەن، كورپوراسيا ءقازىردىڭ وزىندە جالپى قۋاتتىلىعى 101،7 مىڭ توننالىق 29 ءسۇت فەرماسىندا جىلدىق ءوندىرىستى قارجىلاندىردى. 2019 جىلى جەڭىلدەتىلگەن نەسيە العان وسىنداي شارۋاشىلىقتار ۇلەسى قازاقستانداعى بارلىق ءسۇت ءوندىرۋدىڭ شامامەن 25%-ىن قۇرادى. قاراجات ءسۇتتى باعىتتاعى اسىل تۇقىمدى مال، جاڭا اۋىلشارۋاشىلىق تەحنيكاسى مەن ءسۇت فەرمالارىنا ارنالعان جابدىقتار ساتىپ الۋعا بولىنۋدە.
ءوندىرىس قۋاتىن ارتتىرۋ ءۇشىن كورپوراسياعا جۇگىنگەن شارۋا قوجالىقتارىنىڭ ءبىرى – اقمولا وبلىسىنىڭ كامىشەنكا اۋىلداعى «كامىشەنكا» ج ش س. نۇر-سۇلتان قالاسىنان 90 شاقىرىم جەردە ورنالاسقان ءسۇت فەرماسىنىڭ باس ديرەكتورى دۇيسەمباي ىلدەبايەۆ بارلىق ءونىم ەلوردا نارىعىنىڭ سۇرانىسىن قاناعاتتاندىرۋعا كەتەتىنىن ايتادى. 
ءقازىر ءوندىرىس قۋاتى جىلىنا 70 مىڭ ليتر. ۋكراينادان 400 باس گولشتەين سيىرىن ساتىپ الۋدىڭ ارقاسىندا ءوندىرىس كولەمى ەكى-ۇش ەسە وسەدى. گولشتەين – ءسۇتتى باعىتتاعى ەڭ جاقسى سيىر تۇقىمداردىڭ ءبىرى.
فەرماعا ءقازىردىڭ وزىندە 220 باس ءىرى قارا كەلدى، تاعى 180ء-ى جولدا. سيىرلار كەلگەننەن كەيىن كارانتيندە 30 كۇن ۇستالىپ، ءتۇرلى اۋرۋلاردىڭ بولۋىنا تەكسەرۋ جۇرگىزىلەدى.
فەرمەر «اگرارلىق نەسيە كورپوراسياسى» مال ساتىپ الۋدى عانا ەمەس، ونى ۇستاپ تۇرۋ ءۇشىن ەكى فەرما قۇرىلىسىن قارجىلاندىرعانىن اتاپ ءوتتى. جاقىن ارادا ولاردىڭ قۇرىلىسى اياقتالادى.
دۇيسەمباي ىلدەبايەۆ نەسيە الۋ ءۇشىن كورپوراسيانى تاڭداۋىن ونىڭ جۇمىس ەرەكشەلىكتەرىمەن ءتۇسىندىردى – «انك» ماماندارى اۋىل شارۋاشىلىعىن جاقسى بىلەدى.
شارۋاشىلىقتى كەڭەيتۋ جوباسى 2020 جىلدىڭ تامىزىندا قارجىلاندىرىلدى. قارىز الۋشىعا ءقازىردىڭ وزىندە 505 ميلليون تەڭگە ءبولىندى، دەپ مالىمدەدى «اگرارلىق نەسيە كورپوراسياسى» نۇر-سۇلتان قالالىق فيليالىنىڭ ديرەكتورى اسەت كۋشكۋنبايەۆ.
شارۋا قوجالىعىنىڭ جالپى نەسيەلىك جەلىسى 2 ملرد تەڭگەنى قۇرايدى. نەسيە مەرزىمى - جەڭىلدىك كەزەڭىمەن 10 جىل. سىياقى مولشەرى 6%-دى قۇرايدى، بۇل فەرمەرلەر ءۇشىن قولايلى، دەپ اتاپ ءوتتى كورپوراسيا وكىلى.
ايتا كەتەرلىگى، بۇل كورپوراسيانىڭ نۇر-سۇلتان قالالىق فيليالى قارجىلاندىرعان اقمولا وبلىسىنداعى ەكىنشى فەرما. تاعى بىرەۋى اقكول اۋدانىندا ورنالاسقان. وندا 200 باس ءىرى قارا مال ساتىپ الىندى. فەرمانى ىسكە قوسۋ 2020 جىلعا جوسپارلانعان.
«كامىشەنكا» جشس-دە جۇمىس جاسايتىن 150 قىزمەتكەردىڭ بارلىعى جەرگىلىكتى ماماندار. كومپانيا جۇمىس ىستەۋگە اۋىلعا كوشۋگە دايىن ادامدارعا باسپانا ساتىپ الۋعا كومەكتەسۋ ارقىلى قولداۋ كورسەتۋگە دە دايىن. شارۋاشىلىقتىڭ كەڭەيۋى ونىڭ دامۋىنا تىڭ سەرپىن بەرەدى. سونىمەن بىرگە اۋىل حالقىن جۇمىسپەن، قالا تۇرعىندارىن ساپالى وتاندىق ونىممەن قامتاماسىز ەتەدى.
پىكىر قالدىرۋ