مەملەكەت باسشىسى قاسىم-جومارت توقايەۆ الماتى وبلىسىنىڭ اكىمى اماندىق باتالوۆتى قابىلدادى. بۇل تۋرالى اقوردا حابارلادى.
ول پرەزيدەنتكە ءوڭىردىڭ الەۋمەتتىك-ەكونوميكالىق جاعدايى جانە مەملەكەت باسشىسىنىڭ قازاقستان حالقىنا جولداۋىن جۇزەگە اسىرۋ بارىسى تۋرالى ايتتى.
توقايەۆ جولداۋدا بەلگىلەنگەن الەۋمەتتىك شارالاردى ورىنداۋدىڭ جانە پاندەميا جاعدايىندا شاعىن جانە ورتا بيزنەستى قولداۋدىڭ ماڭىزدىلىعىن اتاپ ءوتتى.
باتالوۆ تۇرعىنداردى، اسىرەسە الەۋمەتتىك از قامتىلعاندار ساناتىنداعى ازاماتتاردى "5-10-20" جانە "7-20-25" باعدارلامالارى اياسىندا باسپانامەن قامتۋ جونىندە اقپارات بەردى.
سونىمەن قاتار كەزدەسۋدە اۋىل شارۋاشىلىعى سالاسىن دامىتۋ جانە ينۆەستيسيا تارتۋ ماسەلەلەرى تالقىلاندى. وبلىس اكىمى ىشكى ءتۋريزمدى ودان ارى دامىتۋ، پاندەميا جاعدايىندا وقۋ ۇدەرىسىن ۇيىمداستىرۋ شارالارى تۋرالى اتاپ ايتتى.
كەزدەسۋ سوڭىندا مەملەكەت باسشىسى وبلىستىڭ بەلگىلەنگەن الەۋمەتتىك-ەكونوميكالىق كورسەتكىشتەرىن قامتاماسىز ەتۋدى تاپسىردى.
پىكىر قالدىرۋ