مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆا مەملەكەتتىك قىزمەتتەن كىمدەر قىسقاراتىنى تۋرالى ورتالىق كوممۋنيكاسيالار قىزمەتىنىڭ بريفينگىندە حابارلادى.

ونىڭ ايتۋىنشا، بوس ورىنداردى الىپ تاستاپ، زەينەتتەگىلەردى شىعارۋ ەسەبىنەن شتات قىسقارادى. سونداي-اق بيىل قىزمەتكەرلەردىڭ ون پايىزى، كەلەسى جىلى 15 پايىزى قىسقارتىلۋى كەرەك. بۇل كەزدە 8،5 پايىز جۇمىس ۇلەسى بوس تۇرادى. بيىل قىسقارتۋ وسى بوس ورىنداردىڭ ەسەبىنەن قامتاماسىز ەتىلەدى.

– ءاربىر مەملەكەتتىك ورگان بۇل ماسەلەنى شەشەدى. بۇدان باسقا، ءبىز رەسۋرستى دا پايدالاناتىن بولامىز: بىزدە جۇمىسكەرلەردىڭ زەينەتكە شىعۋى ەسەبىنەن جىل سايىن مىڭنان اسا ورىن بوسايدى. تاعى التى مىڭعا جۋىق جەكە سەكتورعا نەمەسە باسقا ۇيىمدارعا باراتىندار جىل سايىن اۋىسىپ وتىرادى. بۇل ەرەجەلەر دە قولدانىلادى. ءبىراق ءبىز ناقتى ادامداردى قىسقارتپايمىز. ولاردى جۇمىسسىز قالدىرمايمىز. بارلىعى ويلاستىرىلاتىن بولادى. مەنىڭ ويىمشا، مەملەكەتتىك ورگاننىڭ كەز كەلگەن باسشىسى جۇمىستان قىسقارىپ قالاتىن ادامدارعا قامقورلىق جاسايدى، – دەدى ول.