الماتى وبلىسى تەكەلى قالاسىنىڭ اكىمى باحتيار ونەربايەۆ ءوز ەركىمەن وتستاۆكاعا كەتكەنىن مالىمدەدى. ول بۇل تۋرالى facebook-تەگى پاراقشاسىندا جازدى.

"قۇرمەتتى تەكەلى تۇرعىندارى!

مەن قازاقستان رەسپۋبليكاسىنىڭ "مەملەكەتتىك قىزمەت تۋرالى" زاڭىنا سايكەس، زاڭ ۇستەمدىگىن قۇرمەت تۇتاتىن ازامات رەتىندە ءوز ەركىممەن وتستاۆكاعا سۇرانىپ، ءوتىنىش جازدىم. جانە بۇگىن وبلىس اكىمى – اماندىق عابباس ۇلى وتستاۆكامدى قابىلدادى.

2016-جىلدىڭ قاراشا ايىنان باستاپ وزدەرىڭىزدىڭ قولداۋلارىڭىزبەن وسى ۋاقىتقا دەيىن ازدى-كوپتى قىزمەت اتقاردىم. "جەر ءجاناتتى جەتىسۋدىڭ" جاۋھارى بولعان – تەكەلى قالاسىندا اكىم بولىپ قىزمەت ەتكەنىمدى ۇلكەن مارتەبە سانايمىن. سىزدەرمەن بىرگە قويان-قولتىق تەكەلىنىڭ وسىپ-وركەندەۋىنە، دامۋىنا قولدان كەلگەنشە ۇلەس قوستىق. ارينە، ءالى كۇنگە دەيىن كوپتەگەن ماسەلەلەردىڭ ءتۇيىنى شەشىلمەگەنى مەنى دە مازالايدى. ءبىر قۋانتاتىن ءجاي – تەكەلى قالاسىنداعى ەڭ وزەكتى ماسەلەلەردىڭ ءبىرى بولعان – سۋ ماسەلەسى جارتىلاي شەشىلدى، ەندى جالعاسىن تاپپاق. ەكىنشىسى – ەكولوگيالىق ماسەلە، ياعني، قورعاسىن-مىرىش زاۋىتىنىڭ قالا ورتاسىنداعى جاتقان وندىرىستىك قالدىعىنىڭ رەكۋلتيۆاسياسى جوباسى باستالدى، جىلدىڭ سوڭىنا دەيىن اياقتالۋ قاجەت" دەپ جازعان باقتيار ونەربايەۆ وزىنە كورسەتكەندەرگە العىس ايتىپ، تەكەلى قالاسى ەڭ دامىعان، تۋريستىك قالانىڭ بىرىنە اينالاتىنىنا سەنىم ءبىلدىردى.

باقتيار ونەربايەۆ ءوزىنىڭ قولاستىنداعى قىزمەتكەر – اكىم اپپاراتىنىڭ باسشىسى ءباقادۇر نورقۇلوۆقا 2020 جىلعى 6 تامىزىندا تەكەلى قالالىق سوتىنىڭ ۇكىمى شىعىپ، 15 ملن تەڭگە ايىپپۇل سالىنعاننان كەيىن 27 تامىزدا وتستاۆكاعا كەتۋگە ءوتىنىش جازعان.

ءباقادۇر نورقۇلوۆ "مۇگەدەكتەر قوعامى" قوعامدىق بىرلەستىگىنەن 3،7 مىڭ دوللار قارجى پارا الدى دەپ ايىپتالعان. ول پارا الۋ ساتىندە قاشپاق بولىپ، اعىسى قاتتى وزەنگە سەكىرىپ، ءومىرىن قاتەرگە تىككەن.

ارتىنشا، شەنەۋنىك كىناسىن مويىنداپ، پروسەسۋالدى كەلىسىمگە كەلگەن.