سەنات ءتوراعاسى ماۋلەن اشىمبايەۆتىڭ ءتوراعالىق ەتۋىمەن سەنات بيۋروسىنىڭ وتىرىسى ءوتتى. سەناتورلار رەسپۋبليكالىق بيۋدجەتتى زەردەلەپ، پىسىقتايتىن بولادى. بۇل تۋرالى پارلامەنت سەناتىنىڭ رەسمي سايتىندا حابارلاندى.
سەنات بيۋروسىنىڭ وتىرىسىندا الداعى جالپى وتىرىستىڭ كۇن ءتارتىبى تالقىلاندى. اتاپ ايتقاندا ماۋلەن اشىمبايەۆ پارلامەنتكە 1 قىركۇيەكتە كەلىپ تۇسكەن ءۇش جىلعا ارنالعان رەسپۋبليكالىق بيۋدجەت جوباسىنا دەپۋتاتتاردىڭ نازارىن اۋداردى. سەنات ءتوراعاسى ەلدىڭ باستى قارجى قۇجاتىمەن جۇمىستىڭ ناقتى مەرزىمىن بەلگىلەدى.
– ءبىز وسى زاڭدى 1 جەلتوقسانعا دەيىن قابىلداۋىمىز كەرەك. ونى وزدەرىڭىز جاقسى بىلەسىزدەر. سوندىقتان سەنات دەپۋتاتتارى ماجىلىستەگى ارىپتەستەرىمەن بىرگە اتالعان زاڭ جوباسى بويىنشا جۇمىستى باستادى. رەسپۋبليكالىق بيۋدجەت جونىندەگى زاڭ جوباسىن ۋاقىتىلى ءارى ساپالى قابىلداۋ پارلامەنت پەن ۇكىمەتتىڭ ءتيىمدى ءوزارا ءىس-قيمىلىنا بايلانىستى، – دەدى ماۋلەن اشىمبايەۆ.
سەنات ءتوراعاسى جۇرتشىلىق مەملەكەتتىك قارجىنى ءبولۋ ماسەلەلەرىنە ەرەكشە نازار اۋداراتىنىن، قوعامدا رەسپۋبليكالىق بيۋدجەتتى جوسپارلاۋعا قويىلاتىن تالاپتار ارتا تۇسكەنىن ەسكە سالدى.
ماۋلەن اشىمبايەۆ ونى وڭ ءۇردىس رەتىندە سانايدى. سوندىقتان پارلامەنتشىلەر زاڭ جوباسىن مۇقيات زەردەلەپ، قوعام تاراپىنان بار سۇرانىستاردى ەسكەرە وتىرىپ پىسىقتاۋى قاجەت.
پىكىر قالدىرۋ