شەشەنستان باسشىسى رامزان قادىروۆ ءوزىنىڭ Telegram-ارناسىندا تاۋلى قاراباحتاعى قاقتىعىس تۋرالى ايتىپ، تاراپتاردى قانتوگىستى توقتاتۋعا شاقىردى.

– بۇگىن تاۋلى قاراباح، ءازىربايجان جانە ارمەنيادان ۇرەيلى جاڭالىقتار قايتا كەلىپ جاتىر. وسى ۇزاققا سوزىلعان قاقتىعىسقا قاتىسقان بارلىق تاراپتار ءبىر-بىرىن  ايىپتاپ جاتىر. قارۋدىڭ بارلىق تۇرلەرىنەن وق اتىلدى جانە سونىڭ سالدارىنان بەيبىت تۇرعىندار قۇربان بولدى

كاۆكاز – ەجەلگى مادەنيەتى بار كوپتەگەن حالىقتار ءومىر سۇرەتىن تەرريتوريا. ولاردىڭ بارلىعىن تۋىستىق، تاريحي جانە مادەني تامىرلار بىرىكتىرەدى. سوندىقتان كەز-كەلگەن كاۆكازدىق ءۇشىن كورشىنىڭ باقىتسىزدىعى جات ەمەس، بۇل وعان تىكەلەي قاتىستى. بارلىق اۋىرتپالىققا قاراماستان، ءبىزدىڭ، كاۆكازدىقتاردىڭ ادەت-عۇرپىن ۇستاۋ كەرەك. ءبىزدىڭ اكەلەرىمىز بەن اتالارىمىز ءارقاشان داستۇرلەرىمىزگە سۇيەنىپ، قۇرمەت، تەڭدىك، باۋىرمالدىق، نامىس، باتىلدىق زاڭدارىنا باسىمدىق بەردى، – دەدى قادىروۆ.

ول باۋىرلاس ءازىربايجان مەن ارميان حالىقتارىن قاقتىعىستى اقىل مەن ادامگەرشىلىكتى تۇسىنۋدەن الشاقتاتىپ جاتقان ماعىناسىز قانتوگىستى توقتاتۋعا شاقىردى. 

تاۋلى قاراباقتاعى جاعدايعا رەسەي پرەزيدەنتىنىڭ باسپا ءسوز حاتشىسى دميتريي پەسكوۆ تا تۇسىنىكتەمە بەردى.

– ءبىز ۇرىس قيمىلدارى دەرەۋ توقتاتىلىپ، قاقتىعىستى شەشۋ پروسەسى، سونداي-اق قازىرگى شيەلەنىستىڭ سالدارى ساياسي جانە ديپلوماتيالىق ارناعا اۋىسۋى كەرەك دەپ سانايمىز، - دەدى كرەمل وكىلى.

پەسكوۆ اتاپ وتكەندەي، قازىرگى كەزدە "كىمنىڭ دۇرىس، كىمنىڭ بۇرىس ەكەندىگىمەن اينالىسپاي"، سوعىس قيمىلدارىن توقتاتۋ ماڭىزدى.

تاۋلى قاراباح – ءازىربايجان مەن ارمەنيا اراسىنداعى 30 جىلعا سوزىلعان داۋلى تەرريتوريا. مۇنداعى ۇرىس قيمىلدارى 27 قىركۇيەكتە باستالدى. قاقتىعىستىڭ ءورشىپ كەتكەنى ءۇشىن تاراپتار ءبىر-بىرىن ايىپتادى.

ءازىربايجاننىڭ مالىمدەمەسىنە سايكەس، ارمەنيادا 550-دەن استام ادام قازا تاپتى جانە جاراقات الدى.