ۇلتتىق دارى-دارمەك ساراپتاۋ ورتالىعىنىڭ باس ديرەكتورى ەرىك بايجۇنىسوۆكە قاتىستى بىرنەشە رەت پارا الدى دەگەن كۇدىككە بايلانىستى ءۇي قاماققا الۋ تۇرىندەگى بۇلتارتپاۋ شاراسى تاعايىندالدى. بۇل تۋرالى نۇر-سۇلتان قالالىق سىبايلاس جەمقورلىققا قارسى قىزمەتى حابارلادى.
دەپارتامەنت ەلەكتروندى قاداعالاۋشى بىلەزىكتىڭ ەكس-ۆيسە-مينيسترگە تاعىلعانىن ناقتىلادى.
"قازىرگى ۋاقىتتا قىلمىستىق ءىس بويىنشا ءمان-جايدى جان-جاقتى، تولىق جانە وبەكتيۆتى تەرگەۋگە باعىتتالعان زەرتتەۋ جۇرگىزىلىپ جاتىر. تەرگەۋ مۇددەلەرى ءۇشىن قىلمىستىق ءىس جۇرگىزۋ كودەكسىنىڭ 201-بابىنا سايكەس سوتقا دەيىنگى تەرگەۋدىڭ باسقا دەرەكتەرى جاريا ەتىلمەگەن. ءىستىڭ سوڭعى باعاسىن سوت بەرەدى" دەلىنگەن حابارلامادا.
ەرىك ءبايجۇنىسوۆ – الماتى مەملەكەتتىك مەديسينا ينستيتۋتىن بىتىرگەن حيرۋرگ. ول 2010-2014 جىلدار ارالىعىندا دەنساۋلىق ساقتاۋ ۆيسە-مينيسترى بولدى.
رەسپۋبليكالىق دەنساۋلىق ساقتاۋدى دامىتۋ ورتالىعىنىڭ باس ديرەكتورى، استانا قالاسى دەنساۋلىق ساقتاۋ باسقارماسىنىڭ باستىعى، الەۋمەتتىك مەديسينالىق ساقتاندىرۋ قورىنىڭ باسقارۋشى ديرەكتورى قىزمەتتەرىن اتقاردى. 2020 جىلدىڭ 4 تامىزىنان باستاپ "ۇلتتىق دارى-دارمەك ورتالىعى" رمك-نى باسقارادى.
پىكىر قالدىرۋ