اۋىل شارۋاشىلىعىن قارجىلاي قولداۋ جوبالارى مۋلتيپليكاتيۆتى تيىمدىلىگىن كورسەتىپ، اۋىل ومىرىنە تىڭ سەرپىن بەرۋدە. سونداي جوبالاردىڭ ءبىرى – 25 قىركۇيەكتە پاۆلودار وبلىسىنىڭ جاڭاقالا اۋىلىندا پايدالانۋعا بەرىلگەن 600 باس سيىرعا ارنالعان جاڭا ءسۇت فەرماسى.

«قازاگرو» حولدينگىنىڭ «اگرارلىق نەسيە كورپوراسياسى» قارجىلاندىرعان جوبا «جاڭا-قالا» شارۋا قوجالىعىنا ءسۇت ءوندىرىسىن تاۋلىگىنە 7 توننادان 10-14 تونناعا دەيىن ارتتىرۋعا مۇمكىندىك بەرەدى.
«جاڭا-قالا» شارۋا قوجالىعى» ج ش س ديرەكتورى ارداق قاجات جاڭا فەرما ءسۇتتى سيىرلارعا ارنالعان 500 ورىنعا جانە سۋالعان، ترانزيتتىك، بۇزاۋلايتىن سيىرلارعا ارنالعان 100 ورىنعا ەسەپتەلگەنىن ايتادى.

ءسۇت فەرماسى جاڭا تەحنولوگيامەن جابدىقتالادى. مىسالى، يمپورتتالعان جابدىقتىڭ ارقاسىندا ەكى ساۋىنشى ءبىر ۋاقىتتا 24 سيىر ساۋا الادى. اۆتوماتتى سەلەكسيا جۇيەسى دە بار.

«سيىرلارعا ارنايى داچيكتەر ورناتىلادى، ولار وپەراتورعا سيىردىڭ جاي-كۇيى، سۇتتىلىگى جانە دەنساۋلىعىنا قاتىستى اقپاراتى جىبەرەدى. مۇنىڭ ءبارى قوجالىق جۇمىسشىلارىنىڭ جۇكتەمەسىن ازايتادى»، – دەپ اتاپ ءوتتى ارداق قاجات.

«جاڭا-قالادا» 70-كە جۋىق جۇمىسشى بار. جاڭا فەرمانىڭ پايدالانۋعا بەرىلۋى تاعى 15 جەرگىلىكتى ماماندى جۇمىسپەن قامتاماسىز ەتەدى. اتتاس اۋىلدى دامىتىپ، ءومىر سۇرۋگە قولايلى ەتۋ ءۇشىن فەرمەرلەر 50 ورىندىق جاڭا بالاباقشا سالىپ بەرگەن. نىسان 25 قىركۇيەكتە، فەرمانىڭ اشىلۋ سالتاناتىندا تۇرعىندار يگىلىگىنە بەرىلدى.

فەرما قازان ايىنىڭ سوڭىندا، گەرمانيادان سيممەنتال تۇقىمدى 510 بار سيىر جەتكىزىلگەن سوڭ جۇمىس ىستەي باستايدى. شارۋاشىلىق تاۋلىگىنە 14 توننالىق تولىق وندىرىستىك قۋاتىنا الداعى كوكتەمدە شىعادى.

«جوباعا 842 ميلليون تەڭگە بولدىك. جالپى قۇنى شامامەن 1 ميلليارد تەڭگەنى قۇرايدى. كورىپ وتىرعانىمىزداي، ءسۇت فەرماسىنىڭ قۇرىلۋى كوپتەگەن جۇمىس ورىندارىن اشىپ، ايماقتى سۇتپەن قامتاماسىز ەتۋدە» – دەيدى انك پاۆلودار فيليالى ديرەكتورىنىڭ ورىنباسارى ءىزباسار جۇسىپەكوۆ.

كورپوراسيا قوجالىقتى قۇرۋ، جابدىقتاۋ جانە اۋىلشارۋاشىلىق تەحنيكاسىمەن قامتاماسىز ەتۋ شىعىندارىنىڭ 85%-ىن قارجىلاندىردى. جەرگىلىكتى «مولكوم-پاۆلودار» ءسۇت زاۋىتى باۆاريادان ءىرى قارا ساتىپ الۋعا تاعى 500 ميلليون تەڭگە قايتارىمدى قارجى ءبولدى. تۇراقتى شيكىزات كوزى ءسۇت زاۋىتىنىڭ ءوندىرىسىن كەڭەيتۋگە دە ءتيىمدى.

«جوبانىڭ مۋلتيپليكاتيۆتى تيىمدىلىگىن كورىپ وتىرمىز – فەرمەرلەر جاڭا بالاباقشا اشتى. جوبانى قارجىلاندىرۋ ارقىلى ءبىز اۋىلدى دامىتىپ، جۇمىس ورىندارىن، وندىرىستىك جانە الەۋمەتتىك نىساندار قۇرۋدامىز»، – دەيدى ءىزباسار جۇسىپەكوۆ.

جالپى، 2020 جىلدىڭ باسىنان باستاپ «اگرارلىق نەسيە كورپوراسياسى» پاۆلودار وبلىسىندا 600-گە جۋىق اۋىلشارۋاشىلىق تاۋار وندىرۋشىلەرىنە 9،2 ملرد تەڭگە كولەمىندە قولداۋ كورسەتتى.