الماتىداعى دوستىق ۇيىندە «دوڭگەلەك ۇستەل» ءوتىپ، ونىڭ بارىسىندا قازاقستان پرەزيدەنتى قاسىم-جومارت توقايەۆتىڭ «جاڭا جاعدايداعى قازاقستان: ءىس- قيمىل كەزەڭى» جولداۋى تالقىلاندى.

«دوڭگەلەك ۇستەلدىڭ» جۇمىسىنا ق ر مەملەكەتتىك حاتشىسى قىرىمبەك كوشەربايەۆ، الماتى اكىمى باقىتجان ساعىنتايەۆ، شىعارماشىل زيالى قاۋىم وكىلدەرى قاتىستى.

كەزدەسۋدى اشقان مەملەكەتتىك حاتشى مەملەكەت باسشىسىنىڭ بيىلعى جولداۋى ءىس جۇزىندە پاندەميا مەن الەمدىك ەكونوميكالىق داعدارىس جاعدايىندا قازاقستاندى دامىتۋدىڭ جاڭا الەۋمەتتىك-ەكونوميكالىق كەزەڭى ەكەنىن اتاپ ءوتتى. الداعى بارلىق جاڭا وزگەرىستەر مەملەكەت جۇمىسىنىڭ تيىمدىلىگىن ارتتىرۋعا، وزەكتى الەۋمەتتىك-ەكونوميكالىق ماسەلەلەردى شەشۋگە باعىتتالاتىن بولادى.

قىرىمبەك كوشەربايەۆ قازىرگى كۇردەلى جاعدايدا زيالى قاۋىم وكىلدەرىنىڭ داعدارىس كورىنىستەرىن جەڭۋدە، حالىقتىڭ جاڭا ۇقساستىعىن قالىپتاستىرۋدا ۇلكەن ءرول اتقاراتىنىن اتاپ ءوتتى.

ەڭ الدىمەن ۇلى ابايدىڭ تەڭدەسسىز مۇرالارىن جاڭادان وي ەلەگىنەن وتكىزۋ، زيالى قاۋىمنىڭ بۇگىنگى ۋاقىتتىڭ تالابىنا ساي ۇلتتىڭ جاڭا رۋحاني قۇندىلىقتارىن، قوعامنىڭ وسكەلەڭ قاعيدالارى مەن قاسيەتىن قالىپتاستىرۋداعى ميسسياسىن تەرەڭ سەزىنە بىلگەن ءجون.

تۇڭعىش پرەزيدەنت-ەلباسى نۇرسۇلتان نازاربايەۆ ۇسىنعان «رۋحاني جاڭعىرۋ» باعدارلاماسىنىڭ مازمۇنىن بايىتىپ، ونى ىسكە اسىرۋعا تىڭ سەرپىن بەرۋ قاجەت.

الماتى اكىمى ب. ساعىنتايەۆ پرەزيدەنت جولداۋىنا سايكەس مەگاپوليستى دامىتۋدىڭ تاياۋ اراداعى باستى باعىتتارىن اتاپ ءوتتى. مۇندا دەنساۋلىق سالاسىن مودەرنيزاسيالاۋعا جانە پاندەميامەن كۇرەسكە، بارلىق سالانى، ونىڭ ىشىندە ءبىلىم بەرۋ جۇيەسىن كەڭىنەن سيفرلاندىرۋعا جەتە نازار اۋدارىلاتىن بولادى.

«قالا وقۋشىلارىنا قاشىقتان ءبىلىم بەرۋدىڭ جالپىقالالىق „سفەرا“ پلاتفورماسى قۇرىلدى. جاڭا سيفرلىق ءبىلىم كونتەنتى ازىرلەندى، وقىتۋشىلار ءتيىستى دايارلىقتان ءوتتى. بارلىق بالالار، ونىڭ ىشىندە از قامتىلعان وتباسىلاردىڭ بالالارى ءۇشىن قاجەتتى كولەمدە نوۋتبۋكتەر مەن پلانشەتتەر ساتىپ الىندى»، — دەپ حابارلادى ب. ساعىنتايەۆ.

جاستاردىڭ بويىندا يننوۆاسيانىڭ اشىقتىعىن قالىپتاستىرۋعا ەرەكشە نازار اۋدارىلۋدا. سيفرلاندىرۋدىڭ 2025 جىلعا دەيىنگى قولدانبالى ستراتەگياسى ازىرلەندى، قالانىڭ ات-كەڭەسى قۇرىلدى. ستۋدەنتتەر مەن وقۋشىلاردىڭ ات-دارىن پۋلى جاساقتالدى.

بۇلاردان وزگە، جولداۋدىڭ مىندەتتەرىنە سايكەس قالا بالالارىن سپورتپەن، مادەنيەتپەن جانە مەكتەپتەن تىس قوسىمشا ءبىلىم بەرۋمەن كەڭىنەن قامتۋ ءۇشىن بارلىق جاعدايلار جاسالاتىن بولادى.

قالا اكىمى وسكەلەڭ ۇرپاقتىڭ بويىندا دۇرىس رۋحاني قۇندىلىقتاردى قالىپتاستىرۋدا جانە ولاردى تاربيەلەۋدە شىعارماشىل زيالى قاۋىم وكىلدەرىنىڭ ماڭىزدى ءرول اتقاراتىنىن اتاپ ءوتتى.

كەزدەسۋ بارىسىندا ۇلتتىڭ رۋحاني جاڭعىرۋى تۋرالى مادەنيەت پەن عىلىمنىڭ تانىمال قايراتكەرلەرى ورازالى سابدەن، سماعۇل ەلۋباي، مۇرات اۋەزوۆ، تورەگەلدى شارمانوۆ، مۇرات جۇرىنوۆ، راحمان الشانوۆ، ءاسانالى ءاشىموۆ، ءسابيت دوسانوۆ، كەنجەحان ماكەجانوۆ جانە باسقالارى وزدەرىنىڭ ۇتىمدى ۇسىنىستارىمەن ءبولىستى.