الماتىداعى دوستىق ۇيىندە «دوڭگەلەك ۇستەل» ءوتىپ، ونىڭ بارىسىندا قازاقستان پرەزيدەنتى قاسىم-جومارت توقايەۆتىڭ «جاڭا جاعدايداعى قازاقستان: ءىس-قيمىل كەزەڭى» جولداۋى تالقىلاندى.

«دوڭگەلەك ۇستەلدىڭ» جۇمىسىنا ق ر مەملەكەتتىك حاتشىسى قىرىمبەك كوشەربايەۆ، الماتى اكىمى باقىتجان ساعىنتايەۆ، شىعارماشىل زيالى قاۋىم وكىلدەرى قاتىستى. كەزدەسۋ بارىسىندا مادەنيەت پەن عىلىمنىڭ تانىمال قايراتكەرلەرى ۇلتتىڭ رۋحاني جاڭارۋى تۋرالى وزدەرىنىڭ ۇسىنىستارىمەن ءبولىستى.

مەملەكەتتىك حاتشى داعدارىستى جەڭۋدە جانە حالىقتىڭ جاڭا بىرەگەيلىگىن قالىپتاستىرۋدا شىعارماشىل زيالى قاۋىمنىڭ ايرىقشا رولگە يە ەكەنىن اتاپ ءوتتى.

كەزدەسۋدە جازۋشىلار، مادەنيەت پەن عىلىم قايراتكەرلەرى ءوز پىكىرىلەرىن ايتتى. بەلگىلى قازاقستاندىق اكتەر، تەاتر مەن كينو رەجيسسەرى ءاسانالى ءاشىموۆ حالىقتار بىرلىگىنىڭ ماڭىزدىلىعىن اتاپ ءوتتى.

«ەلىمىزدەگى جاعدايدى وزگەرتۋ ورتاق كۇش-جىگەردى تالاپ ەتەدى. بۇگىنگى كۇنى ءبىز پرەزيدەنتتىڭ حالىققا ارناعان جولداۋىندا قويىلعان مىندەتتەردى جۇزەگە اسىرۋعا سوزىمىزبەن جانە ىسىمىزبەن كومەكتەسۋگە ءتيىسپىز»، — دەدى كەزدەسۋگە قاتىسقانداردىڭ الدىندا ا. ءاشىموۆ جانە وسكەلەڭ ۇرپاقتىڭ بويىندا مادەني رۋحتى قالىپتاستىرۋعا ەرەكشە نازار اۋدارۋعا شاقىردى.

جازۋشى، كينودراماتۋرگ سماعۇل ەلۋبايەۆ جولداۋدا پاندەميا سالدارىنان ەلىمىزدە ەكونوميكالىق داعدارىستىڭ بەلەڭ العانىن جانە ونى جەڭۋ ءۇشىن ناقتىلى شارالاردىڭ كورىنىس تاپقانىن ايتتى.

«پرەزيدەنت مۇناي ءداۋىرىنىڭ وتكەنىن ايتتى. بۇل – شىندىق. ەندىگى دامۋ ادامي فاكتوردىڭ جوعارى دەڭگەيىمەن بايلانىستى. جولداۋدا اۋىل شارۋاشىلىعىن دامىتۋعا كوڭىل بولىنگەنى قۋانتادى، ويتكەنى، اۋىلسىز قازاق حالقىن ەلەستەتۋگە بولمايدى. اۋىل شارۋاشىلىعىن دامىتۋ اۋىلدى ساقتاپ قالۋدى بىلدىرەدى. بۇل – سەلونى جۇمىسپەن قامتۋ، بۇل — ەكولوگيالىق ساپالى ءونىم. بۇل – ۇلتتىڭ دەنساۋلىعى. پرەزيدەنت قوعام مەن ءاربىر ادامدى جاۋاپكەرشىلىك پەن بىرلىككە شاقىرادى. ءومىردى ساپالىق جاعىنان وزگەرتۋ جولىندا ءبىز ءبارىمىز بىرگە بولۋعا ءتيىسپىز»، — دەپ اتاپ ءوتتى س. ەلۋبايەۆ.

ءوز كەزەگىندە قوعام قايراتكەرى، مادەنيەتتانۋشى (كۋلتۋرولوگ) مۇرات اۋەزوۆ جالپى قوعام مەن مەملەكەتتىڭ جان-جاقتى دامۋىنىڭ ماڭىزدى ەكەنىن ايتتى.

«جولداۋدا زاماناۋي تالاپتارعا لايىقتى جاۋاپ بەرۋ ءۇشىن قوعام مەن حالىقتىڭ كۇش-جىگەردى بىرىكتىرۋى ءتيىس ەكەندىگى ايقىن كورىنىس تاپقان. ءبىزدىڭ الدىمىزدا حالىقتىڭ جاڭا بىرەگەيلىگىن قالىپتاستىرۋ جونىندە تاريحي مىندەت تۇر، ءبىزدىڭ بولاشاق دامۋىمىز وسىعان بايلانىستى. حالىقتىڭ عاسىرلىق كەمەڭگەرلىگىنىڭ ۇزدىكتەرىن الىپ، العا نىق قادام باسىپ، ەكونوميكالىق، ساياسي، رۋحاني جانە مادەني تۇرعىدا داميتىن بولامىز»، — دەدى م. اۋەزوۆ.