تۇركىستان وبلىسى پوليسيا دەپارتامەنتى باستىعىنىڭ ورىنباسارى اسىلجان قالداربەكوۆتىڭ مالىمەتىنشە، "قاراسورا-2020" جەدەل-ىزدەستىرۋ شارالارى اياسىندا سوزاق پوليسەيلەرى جانە جەرگىلىكتى قورىقشىلار "Toyota Land Cruiser" اۆتوكولىگىن مىنگەن ازاماتتاردى ۇستاعان.

كولىكتى ءتىنتۋ كەزىندە 37 پوليەتيلەن قاپشىعى مەن وسىمدىك تەكتەس ەسىرتكى زاتتارى بار بىرنەشە ىدىس تابىلعان.

ساراپتاما بارىسىندا تاركىلەنگەن ەسىرتكى زاتى جالپى سالماعى 650 كەلىدەن اساتىن "كەپتىرىلگەن ماريحۋانا" جانە 48 كەلىگە جۋىق "گاشيش" ەكەنى انىقتالدى.

ۇستالعان ەكى كۇدىكتى نۇر-سۇلتان قالاسى جانە جامبىل وبلىسىنىڭ بۇرىن سوتتى بولعان تۇرعىندارى ەكەنى بەلگىلى بولدى. كۇدىكتىلەر ەسىرتكى سالىنعان قاپشىقتار مەن ىدىستاردى الدىن الا دايىنداپ، جامبىل وبلىسىنان شىققان. ودان ءارى ولار سوزاق اۋدانى ارقىلى جول بويىنداعى اينالما جولدارمەن قوستاناي وبلىسىنا قاراي كەتپەك بولعان. الايدا بەتپاقدالا اۋماعىندا كولىك جۇرمەيتىن جولدارمەن جاسىرىنىپ كەتىپ بارا جاتقان كولىكتى قورىقشى بايقاپ قالىپ، پوليسياعا حابارلاعان.

اتالعان جايت بويىنشا قىلمىستىق كودەكتىڭ 297-بابى 3-بولىگىنە (ەسىرتكى قۇرالدارىن، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ، جونەلتۋ نەمەسە وتكىزۋ) سايكەس قىلمىستىق ءىس قوزعالدى.

قازىرگى تاڭدا كۇدىكتىلەر قاماۋدا. تەرگەۋ امالدارى ءجۇرىپ جاتىر.