24 جاستاعى ەر ادام كەپىلگە سالىنعان جىلجىمالى جانە جىلجىمايتىن مۇلىككە ارنالعان بانك اۋكسيوندارىنا قاتىستىرامىن دەپ تۋىستارى مەن دوستارىن الداپ، ۇلكەن سوماداعى اقشالارىن الىپ كەتكەن. بۇل تۋرالى polisia.kz حابارلادى. 

– كۇدىكتى ي. مىرزانىڭ ءوزى بانكتەرمەن ەشقانداي بايلانىسى بولماعان، ءبىراق اۋكسيوننىڭ جۇيەسىنەن از دا بولسا حاباردار. ول ءوزىنىڭ قۇرباندارىن ءۇيدى نەمەسە كولىكتى ءتيىمدى تۇردە نارىقتىق باعادان ەداۋىر تومەن باعامەن ساتىپ الۋعا بولاتىندىعىنا سەندىردى. ارينە، بۇل ءۇشىن قاراجات قاجەت بولدى. كەيبىر ىقتيمالدى كليەنتتەر بىردەن بىرنەشە مۇلىككە يە بولامىز دەپ ۇمىتتەنگەن. مىسالى، جابىرلەنۋشىلەردىڭ ءبىرى وعان 182 ميلليون تەڭگەنى سەنىپ تاپسىردى، تاعى ءبىر اڭعال ازامات بۇل ىسكە 386 مىڭ اقش دوللارىن تاپسىردى، – دەدى الماتى قالالىق پوليسيا دەپارتامەنتىنىڭ كريمينالدىق پوليسيا ءبولىمىنىڭ باستىعى ەركىن ىڭكاروۆ.

بۇگىندە كەلتىرىلگەن ماتەريالدىق شىعىن مولشەرى شامامەن ميلليون دوللار. ايىپتى بۇل اقشاعا وزىنە ەكى پاتەر، جاڭا كولىك ساتىپ الىپتى، شەتەلدە دەمالعان.

قازىرگى ۋاقىتتا كۇدىكتى ۇستالىپ، الماتى قالاسىندا ۋاقىتشا ۇستاۋ يزولياتورىنا قامالدى. ول قازاقستان رەسپۋبليكاسى قىلمىستىق كودەكسىنىڭ 4ء-بولىمى 190-بابى – ءىرى كولەمدەگى الاياقتىق بويىنشا ايىپتالىپ بولىپ وتىر.