تاراز قالاسىندا تۇرعىن ۇيلەردىڭ بىرىندە ءورت بولىپ، ەكى بالا قازا تاپتى، دەپ حابارلادى وبلىستىق پوليسيا دەپارتامەنتىنىڭ باسپا ءسوز قىزمەتى.
"1 قازاندا ساعات 09:57 مينۋتتا پوليسياعا، تاراز قالاسى اقمولا كوشەسىندە ءورت ورىن العانى تۋرالى حابار كەلىپ ءتۇستى. وقيعا ورنىنا كەلىپ جەتكەن ءورت سوندىرۋشىلەر ءورتتى سوندىرگەن. وقيعا ورنىن قاراۋ بارىسىندا پوليسەيلەر 2017 جانە 2018 جىلى تۋعان ەكى بالانىڭ ءمايىتىن تاپقان" دەلىنگەن حابارلامادا.
ءقازىر وسى دەرەك بويىنشا قۇىلمىستىق كودەكستىڭ 292بابى 3-بولىگى بويىنشا سوتقا دەيىنگى تەرگەۋ باستالىپ، قاجەتتى ساراپتامالار تاعايىندالدى.
وقيعا ورنىندا ۋلى گازدان ۋلانۋ بەلگىلەرى بار 2018 جانە 2017 جىلدارى تۋعان ەكى بالانىڭ دەنەلەرى مەن بىرنەشە سىرىڭكە قوراپتارى تابىلدى. ءورتتىڭ شىعۋ سەبەبى انىقتالۋدا.
"الدىن الا مالىمەتتەر بويىنشا، بالالادىڭ اكەسى جۇمىستا بولعان، اناسى بالالارىن ۇيگە تاستاپ، سىرتىنان جاۋىپ، مەديسينالىق مەكەمەگە تەكسەرۋگە شىققان. وقيعا ورنىنا وبلىس اكىمىنىڭ ورىنباسارى ەرجان جىلقىبايەۆ پەن قالا اكىمى ايتقازى قارابالايەۆ كەلىپ، وبلىس باسشىلىعى اتىنان كوڭىل ايتتى. زارداپ شەككەن وتباسىنا جان-جاقتى كومەك كورسەتىلەدى، ونىڭ ىشىندە جەرلەۋ ءراسىمىن ۇيىمداستىرۋ مەن پسيحولوگتاردىڭ كومەگى دە بار. وبلىس اكىمدىگى مەن جامبىل وبلىسى تج دەپارتامەنتى اتا-انالاردى بالالارىن قاراۋسىز قالدىرماۋعا شاقىرادى. ەرەسەكتەر قىراعى بولىپ، ءورت قاۋىپسىزدىگى ەرەجەلەرىن ساقتاۋ كەرەك" دەپ تولىقتىردى وبلىس اكىمشىلىگى.
پىكىر قالدىرۋ