قوستاناي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى رۋدنىي قالاسىنىڭ تۇرعىنىنا ۇكىم شىعاردى. سەرگەي پاحتۋسوۆقا ەكى ايەلدى ءولتىرىپ، دەنەلەرىن بولشەكتەگەن دەگەن ايىپ تاعىلدى، دەپ حابارلادى ناشا گازەتا.

ەر ادام كىنالى دەپ تانىلىپ،  ءومىر بويىنا باس بوستاندىعىنان ايىرىلدى. ول جازاسىن توتەنشە قاۋىپسىزدىك كولونياسىندا وتەيدى.

– سوتتالۋشى ۇيلەنگەن، ونىڭ جاس بالاسى بار، ءبىراق ول سول ۋاقىتتا رۋدنىيدىڭ جاس تۇرعىنىمەن كەزدەسىپ جۇرگەن. اراداعى بايلانىستى جاسىرۋ ماقساتىندا سوتتالۋشى قىزدى جالدامالى پاتەرىندە ولتىرگەن. ول قىزدىڭ موينىنا پىشاق تىققان. قايتىس بولعان قىز اجەسىنە تۇرعان جەرى تۋرالى حابارلاما جىبەرگەنىن كورگەندە، ول اجەسىنىڭ پاتەرىنە بەت العان. وندا ول قىزدىڭ اجەسىن موينىنا پىشاق تىعىپ ءولتىردى. كەيىنىرەك مايىتتەردى بولشەكتەپ، سومكەلەرگە سالىپ، ءوزىنىڭ بالكونىنا جاسىرىپ قويعان. كەيىننەن ءمايىت قالدىقتارىن توبىل وزەنىنە باتىرىپ جىبەرگىسى كەلگەن، – دەدى سوت جاننار تىلەۋبايەۆا.

سوتتىڭ ايتۋىنشا، كىسى ءولىمى الدىن-الا جوسپارلانىپ، "ەرەكشە سينيزم جانە سالقىنقاندىلىقپەن" جاسالعان. ايىپكەر بۇرىن قاساقانا كىسى ءولتىرىپ سوتتالعاندىقتان، وسى جولى ونى ءومىر بويىنا باس بوستاندىعىنان ايىرۋ جازاسى تاعايىندالعان. سوتتالۋشى ءوز كىناسىن مويىنداعان، سونىمەن قاتار ىسكە قاتىستى دالەلدەر تابىلعان. 

ۇكىم ءالى زاڭدى كۇشىنە ەنگەن جوق جانە شىعارىلعان كۇننەن باستاپ 15 كۇن ىشىندە شاعىم جاسالۋى مۇمكىن.

كىسى ءولتىرۋ اقپان ايىنىڭ سوڭىندا بولدى. رۋدنىيدا ءوز پاتەرىنەن 68 جاستاعى اربادا وتىراتىن مۇگەدەك ايەل جوعالىپ كەتكەن. ىزدەۋ بارىسىندا اجەسىمەن بىرگە تۇرعان 34 جاستاعى رەگينا دا جوعالىپ كەتكەنى بەلگىلى بولدى.

پوليسيانىڭ مالىمەتىنشە، كۇدىكتى تەز ارادا ۇستالعان. جالدامالى پاتەردە تۇراتىن ازاماتتىڭ بالكونىنان ەكى ادامنىڭ دەنەسى تابىلعان. ەر ادام توبىل وزەنىنىڭ مۇزىن ويىپ ءمايىت قالدىقتارىن تاستاماق بولعان، ءبىراق ول ايعاقتاردى جاسىرىپ ۇلگەرمەگەن.