مەملەكەت باسشىسى قاسىم-جومارت توقايەۆ قورعانىس ءمينيسترى نۇرلان ەرمەكبايەۆتى قابىلدادى، دەپ حابارلادى اقوردا سايتى.
قورعانىس ءمينيسترى پرەزيدەنت قاسىم-جومارت توقايەۆقا ارميانىڭ اسكەري جانە شۇعىل ارەكەتتەرگە دايىندىعى، ازاماتتاردى اسكەرگە شاقىرۋدىڭ كۇزگى ناۋقانىنىڭ بارىسى، سونداي-اق، الماتى وبلىسىندا ءوتىپ جاتقان بىتىمگەرشىلىك وقۋ-جاتتىعۋ جيىنى جونىندە ەسەپ بەردى.
مەملەكەت باسشىسى قورعانىس مينيسترلىگىنىڭ الدىنا ءبىرقاتار مىندەت قويدى.
سونىڭ ىشىندە قارۋلى كۇشتەردى قالىپتاستىرۋ تۇجىرىمداماسىن ازىرلەۋ كەزىندە قازاقستان ارمياسىنىڭ رادياسيالىق جانە حيميالىق قورعانىسىنا قاجەتتى قۇرال-جابدىقتاردىڭ زاماناۋي تۇرلەرىمەن جابدىقتالۋىنا، اسكەري-كولىك اۆياسياسى مەن ينجەنەرلىك اسكەردى كۇشەيتۋگە، ينفراقۇرىلىمدى دامىتۋعا ەرەكشە نازار اۋدارۋدى تاپسىردى.
سونداي-اق توقايەۆ حالىقارالىق اسكەري ىنتىماقتاستىقتى دامىتۋعا، كادرلىق ساياسات پەن اسكەرىمىزدىڭ قىسقى ماۋسىمعا دايىندىعىنا قاتىستى ءبىرقاتار تاپسىرما بەردى.
پىكىر قالدىرۋ