الماتىنىڭ باس سانيتار دارىگەرى جانداربەك بەكشين قازاندا الماتىنىڭ كارانتينگە جابىلاتىنى تۋرالى قاۋەسەتكە جاۋاپ بەردى.

– مۇنىڭ ءبارى جالعان اقپارات. بۇل پروسەسكە قاتىسقىم كەلمەيدى. قالانى جابۋ بولجانبايدى. بىزدە ءوسىم نەمەسە جاڭا شتامم تۋرالى حابارلايتىن ەپيدەميولوگيالىق باقىلاۋ قىزمەتى بار. ءبىز جەتكىلىكتى تۇردە قاداعالاۋدامىز، – دەدى بەكشين.

بۇعان دەيىن جانداربەك بەكشين الماتىداعى كوروناۆيرۋسقا قاتىستى جاعدايدى تۇراقتى دەپ ايتقان.

ايتا كەتەيىك، بۇگىننەن باستاپ الماتى اكىمدىگى قالانىڭ حالىقارالىق اۋەجايىندا سانيتارلىق-ەپيدەميولوگيالىق باقىلاۋدى كۇشەيتۋ شارالارىن قابىلدادى.

قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ №54 قاۋلىسىن ىسكە اسىرۋ شەڭبەرىندە قالانىڭ باس مەملەكەتتىك سانيتار دارىگەرى جانداربەك بەكشين الماتى حالىقارالىق اۋەجايىندا قازاقستان رەسپۋبليكاسى مەملەكەتتىك شەكاراسىندا سانيتارلىق-ەپيدەميالىق شارالاردى قاتاڭداتۋ جونىندە قاۋلى قابىلدادى.

وسىعان بايلانىستى الماتى حالىقارالىق اۋەجايىنىڭ اۋماعىندا حالىقارالىق جولاۋشىلار اۋە ارەيستەرىمەن كەلەتىن ادامداردىڭ بايلانىسسىز تەرمومەترياسى جۇرگىزىلەدى. اۋەجاي قىزمەتكەرلەرى جەكە قورعانىس قۇرالدارىمەن قامتاماسىز ەتىلگەن. اۋەجاي اۋماعىندا مىندەتتى ماسكا رەجيمى جانە الەۋمەتتىك قاشىقتىقتى ساقتاۋ تالابى ساقتالادى.

الماتى اكىمدىگىنىڭ تاپسىرماسى بويىنشا اۋەجاي عيماراتىندا ۇشىپ شىعاتىن جولاۋشىلار ءۇشىن پتر-دياگنوستيكاعا ليسەنزيالانعان سىناما الۋ پۋنكتى اشىلدى.

دەنە قىزۋى جوعارى نەمەسە اۋرۋ بەلگىلەرى (جوتەل، ەنتىگۋ، تىنىس الۋدىڭ قيىنداۋى) بار ادامدار الماتى قالاسى اۋەجايىنىڭ وقشاۋلاعىشىنا ورنالاستىرىلادى نەمەسە اۋە كەمەسىنىڭ بورتىنان جەدەل جاردەم ماشينالارىمەن ديففەرەنسيالدى دياگنوستيكا مەن ەمدەۋ جۇرگىزۋ ءۇشىن قالانىڭ ينفەكسيالىق ستاسيونارلارىنا تاسىمالداناتىن بولادى.

ق ر باس مەملەكەتتىك دارىگەرىنىڭ قاۋلىسىنا سايكەس، ق ر مەملەكەتتىك شەكاراسىنان ءوتۋ كەزىندە وزگە ەلدىڭ ازاماتتارى قولدارىندا COVID-19-عا الىنعان تەستتىڭ ناتيجەسى 72 ساعاتتان اسپاعانىن كورسەتەتىن انىقتاما بولماعان جاعدايدا، قالاعا كىرۋلەرىنە جول بەرىلمەيدى.

شەتەلدەن انىقتاماسىز كەلگەن ق ر ازاماتتارى اۋەجاي اۋماعىنان پتر-تەستىلەۋدى وتكىزۋ ءۇشىن جانە ناتيجەلەردى كۇتۋ كەزەڭىندە ۋاقىتشا مەگاپوليستىڭ قوناق ۇيلەرىنە ورنالاستىرىلادى.